काठमाडौं । गृह मन्त्रालयले ऋण असुलीका नाममा ऋणीलाई दुःख, यातना तथा गैरकानुनी व्यवहार गर्ने बैंक तथा वित्तीय संस्थाहरूमाथि कडा कारबाही गर्न निर्देशन दिएको छ।
मन्त्रालयले परिपत्र जारी गर्दै ऋणीको घरबाट जबरजस्ती सामान उठाउने, धरपकड गर्ने, गालीगलौज तथा दुर्व्यवहारजस्ता गैरकानुनी कार्य गरेमा कारबाही गर्न प्रहरी तथा स्थानीय प्रशासनलाई निर्देशन दिएको हो। बैंकिङ वा वित्तीय असुलीका नाममा यस्ता व्यवहार भोगेका पीडितले सम्बन्धित जिल्ला प्रशासन कार्यालयमा उजुरी दिन सक्ने र सोही उजुरीका आधारमा प्रशासनले कारबाही अघि बढाउने मन्त्रालयले जनाएको छ।
यता, गृह मन्त्रालयको यस्तो परिपत्रपछि बैंक तथा वित्तीय संस्थाहरू भने ऋण असुली प्रभावित हुने चिन्तामा परेका छन्। सरकारले नै ‘ऋण असुलीमा कडा वा निर्मम नबन्नु’ भन्ने आशयको परिपत्र जारी गरेपछि नियमित रूपमा उठ्नुपर्ने ऋणसमेत नउठ्ने र खराब कर्जा बढ्ने खतरा रहने भन्दै बैंकरहरूले असन्तुष्टि र चिन्ता व्यक्त गरेका छन्।
