सर्लाही –
सर्लाहीको हरिवनबाट २३.३१० ग्राम अवैध लागूऔषध खैरो हेरोइनसहित दुई जना पक्राउ परेका छन्। लागूऔषध नियन्त्रण ब्यूरोको विशेष प्रहरी टोलीले उनीहरूलाई पक्राउ गरेको हो।
ब्यूरोको शाखा कार्यालय बर्दिबास, महोत्तरीबाट खटिएको टोलीले हिजो हरिवन नगरपालिका–४ बाट स्थानीय ३२ वर्षीय सागर पाख्रिन र २५ वर्षीय राज भुजेललाई नियन्त्रणमा लिएको ब्यूरोले जनाएको छ।
प्रहरीले उनीहरूको साथबाट २३.३१० ग्राम खैरो हेरोइन, एक थान डिजिटल तराजु र दुई थान मोबाइल बरामद गरेको छ। डिजिटल तराजु र मोबाइल बरामद हुनुले घटनामा लागूऔषध कारोबारको आशंकासमेत उठाएको छ। यद्यपि, कारोबारमा उनीहरूको संलग्नता अनुसन्धानबाट पुष्टि हुन बाँकी छ।
लागूऔषध (नियन्त्रण) ऐन, २०३३ अनुसार बरामद लागूऔषधको परिमाणका आधारमा कसुर प्रमाणित भएमा उनीहरूलाई पाँचदेखि १० वर्षसम्म कैद र पाँच हजारदेखि २५ हजार रुपैयाँसम्म जरिवाना हुन सक्ने ब्यूरोले जनाएको छ।
पक्राउ परेका दुवै जनालाई थप अनुसन्धान तथा आवश्यक कानुनी कारबाहीका लागि इलाका प्रहरी कार्यालय हरिवन, सर्लाहीमा बुझाइएको छ।
ब्यूरोका सहप्रवक्ता एवं प्रहरी नायब उपरीक्षक जीवन निरौलाद्वारा जारी विज्ञप्तिमा उक्त जानकारी दिइएको छ ।
