सर्लाही –
सर्वोच्च अदालतका तत्कालीन न्यायाधीश रणबहादुर बमको हत्यामा दोषी ठहर भई जन्मकैदको सजाय भोगिरहेका बाबु थापा फेरि प्रहरीको नियन्त्रणमा परेका छन्। जेनजी आन्दोलनका क्रममा कारागारबाट फरार भएका थापा सर्लाहीस्थित आफ्नै घरबाट पक्राउ परेका हुन्। उनी पक्राउ पर्दा दुई थान पेस्तोल र १५ राउन्ड गोलीसमेत बरामद भएको प्रहरीले जनाएको छ।
प्रहरीका अनुसार बुधबार राति बागमती नगरपालिका–स्थित मिलनचोकमा रहेको घरबाट थापालाई पक्राउ गरिएको हो। उनी घरमा आएको गोप्य सूचनाका आधारमा प्रहरीले निगरानी बढाएको थियो। सर्लाहीका प्रहरी उपरीक्षक रविन्द्रनाथ पौडेलका अनुसार थापाको साथबाट दुई थान पेस्तोल, तीनवटा म्यागजिन र १५ राउन्ड गोली बरामद गरिएको छ।
हत्याका दोषी, जेलबाट फरार र फेरि हातहतियारसहित पक्राउ
थापाको पक्राउ केवल एक फरार कैदीको पुनः गिरफ्तारीमा सीमित छैन। न्यायाधीश हत्याजस्तो गम्भीर अपराधमा दोषी ठहर भएका व्यक्ति कारागारबाट फरार हुनु र त्यसपछि हातहतियारसहित फेला पर्नुले सुरक्षा व्यवस्थामाथि समेत प्रश्न उठाएको छ।
गत भदौ २४ गते जेनजी आन्दोलनका क्रममा काठमाडौंको सुन्धारास्थित केन्द्रीय कारागार, जगन्नाथदेवलबाट फरार भएपछि थापा प्रहरीको खोजीमा थिए। प्रहरीका अनुसार उनी नेपाल र भारतका विभिन्न स्थानमा लुकेर बस्दै आएका थिए। भेष बदलेर हिँड्ने र आवश्यक पर्दा अरूको मोबाइल प्रयोग गरी सम्पर्क गर्ने गरेको सूचनाका आधारमा उनको खोजी भइरहेको थियो।
तर, उनी आफ्नै घरसम्म कसरी आइपुगे र बरामद हतियार कहाँबाट ल्याइएका थिए भन्ने विषयमा प्रहरीले अनुसन्धान गर्नुपर्ने देखिन्छ। यसबारे प्रहरीले विस्तृत विवरण सार्वजनिक गरिसकेको छैन।
दुई वर्ष सात महिनाको खोजीपछि पक्राउ परेका थिए
थापा यसअघि पनि लामो समयको खोजीपछि पक्राउ परेका थिए। न्यायाधीश बम हत्या प्रकरणमा दोषी ठहर हुनुअघि प्रहरीले दुई वर्ष सात महिनासम्म निगरानी र खोजी गरेपछि २०७१ सालमा उनलाई पक्राउ गरेको थियो।
त्यतिबेला उनको पक्राउलाई प्रहरीको ठूलो उपलब्धिका रूपमा लिइएको थियो। केन्द्रीय अनुसन्धान ब्युरो (सीआईबी) ले उनलाई सार्वजनिक गर्दा तत्कालीन प्रहरी महानिरीक्षक उपेन्द्रकान्त अर्याल स्वयं पत्रकार सम्मेलनमा उपस्थित भएका थिए। अर्यालले उक्त पक्राउलाई प्रहरीको घाँटीमा अड्किएको काँडा निकालिएसरह भएको टिप्पणी गरेका थिए।
चुरेभावर राष्ट्रिय पार्टीका तत्कालीन उपाध्यक्ष रहेका थापा पार्टीभित्रको नेतृत्व विवादसँग जोडिएको न्यायाधीश हत्या प्रकरणमा दोषी ठहर भएका थिए।
के थियो न्यायाधीश बम हत्या प्रकरण?
२०६९ जेठ १८ गते ललितपुरको यूएन पार्क क्षेत्रमा सर्वोच्च अदालतका तत्कालीन न्यायाधीश रणबहादुर बमको गोली हानी हत्या गरिएको थियो। बंगलामुखी मन्दिरमा दर्शन गरेर फर्कने क्रममा उनको गाडी रोकेर गोली प्रहार गरिएको थियो।
प्रहरी अनुसन्धानअनुसार चुरेभावर राष्ट्रिय पार्टीभित्रको नेतृत्व विवाद र सर्वोच्च अदालतको अन्तरिम आदेश हत्याको पृष्ठभूमिसँग जोडिएका थिए।
पार्टीको आधिकारिक नेतृत्वसम्बन्धी विवाद निर्वाचन आयोग हुँदै सर्वोच्च अदालत पुगेको थियो। आयोगले केशव मैनालीको सट्टा बाबु थापा नेतृत्वको समूहलाई वैधानिकता दिएपछि मैनाली त्यसविरुद्ध सर्वोच्च अदालत पुगेका थिए। न्यायाधीश बमको एकल इजलासले थापा समूहलाई वैधानिकता दिने आयोगको निर्णय कार्यान्वयन नगर्न अन्तरिम आदेश दिएको थियो।
अनुसन्धानका क्रममा राजनीतिक भविष्य समाप्त हुने आशंकाले हत्याको योजना बनाइएको निष्कर्ष निकालिएको थियो। यही प्रकरणमा दोषी ठहर भएपछि थापा जन्मकैदको सजाय भोगिरहेका थिए।
अब प्रहरी अनुसन्धानको घेरामा हतियारको रहस्य
जेनजी आन्दोलनका क्रममा कारागारबाट फरार भएका थापा अन्ततः सर्लाहीस्थित आफ्नै घरबाट पक्राउ परेका छन्। तर, उनको गिरफ्तारीसँगै दुई पेस्तोल, तीन म्यागजिन र १५ राउन्ड गोलीको स्रोतबारे प्रश्न उठेको छ।
प्रहरीले उनीविरुद्ध हातहतियार तथा खरखजाना सम्बन्धी कसुरमा सर्लाही जिल्ला अदालतमा मुद्दा प्रक्रिया अघि बढाउने जनाएको छ। बरामद हतियारको स्रोत, त्यसको सम्भावित प्रयोग र फरार अवधिमा उनको गतिविधिबारे अनुसन्धानपछि थप तथ्य खुल्ने अपेक्षा गरिएको छ।
