वीरगन्ज –
विश्व मुख स्वास्थ्य दिवसको अवसरमा नेशनल मेडिकल कलेजले सचेतना कार्यक्रम आयोजना गरेको छ । “खुशी मुख खुशी मन” भन्ने नाराका साथ मनाइएको यस दिवसको अवसरमा कलेजले निःशुल्क स्वास्थ्य जाँच र उपचारमा छुटको व्यवस्था गरेको थियो ।
कार्यक्रममा १२५ जनाले निःशुल्क मुख स्वास्थ्य जाँच गराएका थिए भने उपचारमा १० प्रतिशत छुट दिइएको थियो ।
डेन्टल कलेजका प्रो.डा. सरोज प्रसाद देवको अध्यक्षतामा सम्पन्न कार्यक्रममा एडमिसन एवं मार्केटिङ डाइरेक्टर आबिद हुसेन अन्सारी प्रमुख अतिथि थिए । कार्यक्रममा डा. रवि शंकर गुप्ता, एके काशी, गंगा गुरुङ, गौसुल आजम, डेन्टलका डा. हरीश कुमार शाह, डा. सरोज नायक, डा. साना इमानी लगायतको उपस्थिति रहेको थियो ।
विश्व स्वास्थ्य संगठनको आह्वानमा हरेक वर्ष मार्च २० मा विश्वभर विश्व मुख स्वास्थ्य दिवस मनाइन्छ । यस दिवसको उद्देश्य मुख स्वास्थ्यको महत्वबारे जनचेतना जगाउनु हो।
