हेटौँडा –
मकवानपुरको बकैया गाउँपालिका वडा नम्बर ३, चिसापानी बजार नजिकै धरान–चतरा सडक खण्डमा बुधबार राति यात्रुवाहक बस दुर्घटना हुँदा ३१ जना घाइते भएका छन्। सिन्धुलीबाट हेटौँडातर्फ आउँदै गरेको बा.प्र.०६-००१ ख ०२७० नम्बरको बस घुम्तीमा अनियन्त्रित भई पल्टिएको जिल्ला प्रहरी कार्यालय मकवानपुरले जनाएको छ।
जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक श्यामु अर्यालका अनुसार, दुर्घटनाग्रस्त बसमा भीमफेदी गाउँपालिकाको कृषि तथा पशु शाखाबाट अगुवा कृषक भ्रमणमा गएका कृषक र प्राविधिकहरू सवार थिए। भ्रमण सकेर फर्किंदै गरेको अवस्थामा राति करिब ९:३० बजे चिसापानी बजार नजिकैको घुम्तीमा बस दुर्घटनामा परेको हो।
प्रहरीका अनुसार बसमा चालकसहित ३१ जना यात्रु सवार थिए, र सबै घाइते भएका छन्। घाइतेहरूको उद्धार गरी नजिकैको अस्पतालमा उपचारका लागि पठाइएको छ। दुर्घटनाको कारणबारे थप अनुसन्धान भइरहेको प्रहरी प्रवक्ता अर्यालले बताए। सडकको घुम्ती र रातिको समयले दुर्घटना निम्त्याउन भूमिका खेलेको हुन सक्ने प्रारम्भिक अनुमान गरिएको छ।
घटनास्थलमा प्रहरी टोली खटिएर उद्धार कार्य सम्पन्न गरेको छ भने घाइतेहरूको स्वास्थ्य अवस्थाबारे थप जानकारी आउन बाँकी छ।
