काठमान्डौँ-
सनी देओल यतिबेला फिल्म ‘जाट’ का कारण चर्चामा छन्। फिल्मले बक्स अफिसमा शानदार प्रदर्शन गरिरहेको छ। तर, रिलिजपछि फिल्म ठूलो विवादमा फसेको छ। पञ्जाबमा ईसाई समुदायले सनी देओल र रणदीप हुड्डाको फिल्म ‘जाट’ को विरोधमा प्रदर्शन गरेको थियो। त्यसपछि जालन्धरमा प्रहरीमा उजुरी दर्ता गरिएको छ। आरोप छ कि फिल्ममा रणदीप हुड्डाले येशू ख्रिष्ट र ईसाई धर्ममा प्रयोग हुने पवित्र वस्तुहरूको अपमान गरेका छन्।
जालन्धरको सदर थानामा ‘जाट’ फिल्मका बलिउड अभिनेता सनी देओल, रणदीप हुड्डा, विनीत कुमार, निर्देशक गोपी चन्द, निर्माता नवीन मालिनेनीविरुद्ध मुद्दा दर्ता भएको छ।
किन गरिएको छ विरोध?
जालन्धरमा ईसाई समुदायले लिखित उजुरी दिँदै यदि कारबाही नभए पञ्जाबका सिनेमाघरहरूमा फिल्ममाथि प्रतिबन्ध लगाउने माग गरेका छन्। उजुरीमा भनिएको छ कि फिल्मको एक दृश्यमा अपमानजनक चित्रण गरिएको छ, जसले धार्मिक भावनामा ठेस पुगेको छ। यसअघि तमिलनाडुका बासिन्दाले पनि फिल्मलाई प्रतिबन्ध लगाउन माग गरेका थिए, किनभने फिल्ममा लिट्टे समुदाय (लिबरेसन टाइगर्स अफ तमिल ईलम) लाई आतंकवादीको रूपमा चित्रण गरिएको उनीहरूको दाबी छ।
‘जाट’ को हालसम्मको कमाई
‘जाट’ ले रिलिजपछि नै दर्शकको ध्यान तानेको छ। बिहीबार फिल्मले चार करोड रुपैयाँको कलेक्शन गरेको थियो, जससँगै यसको कुल कलेक्शन १२.६ करोड रुपैयाँ पुगेको छ। फिल्मको कथा, शक्तिशाली एक्सन दृश्य र पात्रहरूको गहिराइले यसलाई दर्शकमाझ लोकप्रिय बनाएको छ।
‘जाट २’ को पनि घोषणा
‘जाट २’ को बारेमा खबर छ कि आगामी एक्सन फिल्मको निर्देशन पनि गोपीचन्द मालिनेनीले गर्नेछन्। पोस्टरमा निर्माता नवीन यरनेनी, रविशंकर वाई र टीजी विश्व प्रसादको नाम पनि उल्लेख गरिएको छ। ‘जाट २’ को निर्माण पनि मैत्री मूवी मेकर्स प्रोडक्सन हाउसले गर्नेछ। फिल्मको सिक्वेलमा सनी देओलको सहभागिता पक्का भएको छ। यद्यपि, अन्य कलाकारहरूको बारेमा निर्माताले कुनै जानकारी दिएका छैनन्।
