काठमाडौँ-
नेकपा (एकीकृत समाजवादी) का महासचिव घनश्याम भुसालले लहडका आधारमा संविधान संशोधन भए देश बहुआयामिक द्वन्द्वमा फस्ने चेतावनी दिएका छन्। मंगलबार राजधानीमा पार्टीले आयोजना गरेको १५६औँ लेनिन जयन्ती तथा नेकपा स्थापनाको ७६औँ वार्षिकोत्सवको अवसरमा भएको विचार गोष्ठीमा बोल्दै उनले यस्तो चेतावनी दिएका हुन्।
भुसालले संविधान संशोधनका विषयमा उठेका बहसहरूलाई गम्भीरतापूर्वक लिनुपर्ने बताउँदै भने, “शासकको लहडमा संविधान संशोधन हुने हो भने देश बहुआयामिक द्वन्द्वमा फस्नेछ। कसैले धर्मनिरपेक्षताको नाममा, कसैले निर्वाचन प्रणालीको नाममा, कसैले शासकीय स्वरूपको नाममा त कसैले समावेशीकरणको नाममा संविधान च्यात्ने खतरा छ।” उनले यस्तो कार्यले देशलाई अस्थिरतातर्फ धकेल्ने जोखिम रहेको औंल्याए।
कार्यक्रममा भुसालले देश असफल हुने तर नेता र पार्टी सफल हुने अवस्था देखिएको भन्दै शासकहरू जहाँ गए पनि विरोधको सामना गर्नुपरेको बताए। उनले प्रधानमन्त्री केपी शर्मा ओलीले वैशाख ११ गते ठूलो भिड जम्मा गरेर आफ्नो शक्ति प्रदर्शन गर्न खोजेको आरोप लगाए। “शासकमाथिको विरोधलाई प्रतिवाद गर्न प्रधानमन्त्रीले वैशाख ११ गते ठूलो भिड जम्मा गर्दैछन्। तर, जुलुसमा आउनेहरूले ‘आइ लभ यु केपी बा’ भन्नुको सट्टा ‘कमरेड केपी, हाम्रो हिसाब देऊ, क्रान्तिको हिसाब देऊ, पार्टी विघटन, संसद् विघटन र लोकतन्त्रमाथिको आक्रमणको हिसाब देऊ’ भन्नुपर्छ,” उनले भने।
भुसालले समाजवादी क्रान्तिका लागि उच्च बौद्धिकता र दृढताको आवश्यकता रहेको बताए। उनले लेनिनको बौद्धिकता र दृढताको उदाहरण दिँदै भने, “पुँजीवादीहरूले लेनिनमाथि जतिसुकै आलोचना गरे पनि उनको बौद्धिकता र दृढतामाथि कसैले प्रश्न उठाउन सकेन। त्यही बौद्धिकता र दृढता हाम्रो लागि पनि अनुकरणीय छ।”
यो गोष्ठीमा नेकपा एकीकृत समाजवादीले देशको वर्तमान राजनीतिक अवस्था र समाजवादी आन्दोलनको भविष्यबारे छलफल गरेको थियो। भुसालको यो चेतावनीले संविधान संशोधनको बहसलाई थप गम्भीर बनाएको छ।
