पर्सा –
मनोज ग्यास कम्पनी र बिक्रेता विनय लालमाथि तौल कम भएको ग्यास सिलिन्डर वितरण गरेको आरोपमा पीडित उपभोक्ता सनोज साह र उनका दाजु सरोज साहले वाणिज्य आपूर्ति तथा उपभोक्ता संरक्षण समितिमा उजुरी दर्ता गराएका छन्। फागुन १६ गते दर्ता गरिएको उजुरीमा कालोबजारी र उपभोक्ता ऐनअनुसार छानबिन गरी कारबाहीको माग गरिएको छ।
कार्यालय प्रमुख सुनिल चौरसियाले यो विषयमा गम्भीरतापूर्वक छानबिन गरी कारबाही प्रक्रिया अगाडि बढाउने प्रतिबद्धता जनाएका छन्। उनले तौल कम भएको सिलिन्डर कसैलाई हस्तान्तरण वा छेडछाड नगर्न निर्देशन दिए। तर, सोही दिन मनोज ग्यास कम्पनीका अरुण दासले जिल्ला प्रशासन कार्यालय, पर्सामा छलफलका लागि निवेदन दर्ता गराए।
जिल्ला प्रशासन कार्यालय, पर्साका उजुरी फाँट प्रमुख गौरीशंकर साह कानुले कम्पनीको निवेदनका आधारमा पीडित उपभोक्ता, डिलर र कम्पनीबीच तौल कम भएको समस्याबारे छलफल गर्न बोलाएको बताए। बैठकमा ग्यास बिक्रेता सङ्घ पर्साका अध्यक्ष वीरेन्द्र साह, गणेशमान श्रेष्ठ, इन्द्रजित यादव, विनय लाललगायत उपस्थित थिए। पीडित सनोज साहका साथमा राजनीतिक कार्यकर्ता जलेश्वर सरार्फ र उनका दाजु सरोज साह सहभागी थिए।
छलफलमा नेता सरार्फले इतिहासमा पहिलोपटक पीडक कम्पनीले पीडित उपभोक्तामाथि नै छलफल गराउने देखिएको भन्दै यो नियमसङ्गत नभएको बताए। पीडित सनोज साहले मंगवार देखिनै जिल्ला प्रशासन कार्यालय, पर्साबाट फोन नम्बर ०५१५२४०६६ मार्फत फोन आएर विवादित सिलिन्डर तुरुन्त ल्याउन दबाब दिएको बताए। उनले एउटा निकायमा कानुनी प्रक्रियाका लागि निवेदन दर्ता भइसकेपछि अर्को निकायले बिनाकुनै रीत सिलिन्डर मगाउनु रहस्यमय भएको बताए।
यता, ग्यास बिक्रेता सङ्घ पर्साका अध्यक्ष वीरेन्द्र साहले मनोज ग्यास कम्पनीले विवादित बिक्रेता विनय साहको डिलर अनुमति रद्द गरेको जानकारी दिए। यस प्रकरणमा थप छानबिन र कानुनी कारबाहीको माग जोडदार रूपमा उठिरहेको छ।
संबन्धित खबर
मनोज ग्यास उद्योगद्वारा सिलिन्डरमा तौल कम : उपभोक्ता ठगी प्रकरणमा नयाँ खुलासा (भिडियो सहित )
मनोज ग्यास सिलिन्डरमा ४ किलो ग्यास कम, उपभोक्ता ठगिएको खुलासा (भिडियो सहित )
