स्वास्थ्यमन्त्री प्रदीप पौडेलको सक्रियतामा मन्त्रालयले काज फिर्ता र रमाना बाँकी कर्मचारीलाई खटाइएको स्थानमा हाजिर हुन पत्राचार गरेको हो।

काठमाडौँ –

स्वास्थ्य तथा जनसङ्ख्या मन्त्रालयले काजमा रहेका र सरुवा भई रमाना हुन बाँकी कर्मचारीलाई तीन दिनभित्र खटाइएको स्थानमा हाजिर हुन निर्देशन दिएको छ।

स्वास्थ्यमन्त्री प्रदीप पौडेलको सक्रियतामा मन्त्रालयले काज फिर्ता र रमाना बाँकी कर्मचारीलाई खटाइएको स्थानमा हाजिर हुन पत्राचार गरेको हो। मन्त्रालयले यो निर्णय कार्यान्वयन नगर्ने कार्यालय प्रमुखबाट काज र रमाना बाँकी कर्मचारीले लिएको तलब–भत्ता र सुविधा असुल गरी विभागीय कारबाही गर्ने चेतावनी दिएको छ।

स्वास्थ्य सेवामा दरबन्दी बाहिर काजमा बस्ने प्रवृत्तिका कारण सरुवा भएका कर्मचारीलाई हाजिर गराउन समस्या भएको गुनासो बढेपछि मन्त्रालयले यो कदम चालेको हो। पत्रमा भनिएको छ, “काजमा कार्यरत र सरुवा भई रमाना हुन बाँकी कर्मचारीलाई तीन दिनभित्र हाजिर गराई पदस्थापन गर्न र सोको जानकारी मन्त्रालयलाई दिनुहोस्। अन्यथा तलब–भत्ता असुल गरी कारबाही हुनेछ।”

यो निर्णय २०८२ जेठ २८ गतेको सचिवस्तरको बैठकबाट अनुमोदन भएको मन्त्रालयले जनाएको छ।