सिराहा —

सिराहाको अर्नमा गाउँपालिका–१, बुढियाचाप गाउँमा शनिबार भएको एक शङ्कास्पद मृत्यु प्रकरणमा प्रहरीले दुई जनालाई पक्राउ गरेको छ। स्थानीय ३५ वर्षीय अजय महरा मृत अवस्थामा फेला परेपछि प्रहरीले मृतककी श्रीमतीसहित एक युवकलाई नियन्त्रणमा लिएर अनुसन्धान सुरु गरेको हो।

जिल्ला प्रहरी कार्यालयका सूचना अधिकारी, प्रहरी नायब उपरीक्षक वीरेन्द्रकुमार पासवानका अनुसार, घटना शङ्कास्पद रहेको छ। मृतकको शव परीक्षणका लागि धरानस्थित बिपी कोइराला स्वास्थ्य विज्ञान प्रतिष्ठानमा पठाइएको छ। शव परीक्षणको प्रतिवेदन प्राप्त भएपछि घटनाको थप रहस्य खुल्ने उनले बताए।

स्थानीयका अनुसार, महराको शव छिमेकीको खेत नजिकै आँपको रुखमुनि सेतो प्लास्टिकले घाँटी बाँधिएको अवस्थामा फेला परेको थियो। प्रहरीले घटनास्थलको अनुसन्धान गरिरहेको छ र पक्राउ परेका दुवै जनामाथि थप सोधपुछ भइरहेको जनाएको छ।