वीरगन्ज-
रक्सौल चेकपोस्ट नजिक सशस्त्र सीमा बल (एसएसबी) को ४७औं बटालियनको मानव तस्करी रोधी इकाई (एएचटीयू), स्वच्छ रक्सौल र माईती नेपाल (एनजीओ) को संयुक्त टोलीले नाबालिग किशोरीलाई मानव तस्करीबाट बचाएको छ। साउन १,  मा जाँचका क्रममा नेपालबाट भारत पैदल आउँदै गरेका मोहम्मद समीर नामक व्यक्तिसँगै एक नाबालिग किशोरीलाई संदिग्ध अवस्थामा रोकेर सोधपुछ गर्दा मानव तस्करीको आशंका पुष्टि भएको थियो।

प्रहरीका अनुसार, समीरले ‘आकाश’ नामको फर्जी फेसबुक आईडी प्रयोग गरी आफूलाई हिन्दूको रूपमा प्रस्तुत गरेर महोत्तरी, बर्दीवासकी नाबालिग किशोरी सोनी कुमारीलाई प्रेमजालमा फसाएका थिए। काउन्सेलिङमा किशोरीलाई तस्करको वास्तविक नाम र उनलाई उत्तर प्रदेश (भारत) लैजाने योजनाबारे कुनै जानकारी नभएको खुल्यो। समीरको मोबाइलमा फर्जी आईडीबाट अन्य हिन्दू किशोरीहरूसँग सम्पर्क गरेको डेटा पनि भेटिएको छ।

एएचटीयू, स्वच्छ रक्सौल र माईती नेपालको टोलीले गहन सोधपुछ र काउन्सेलिङमार्फत किशोरीलाई तस्करीको खतरा बुझाए। सोनी केही दिनमै समीरको जालमा फसेर परिवारलाई बिना जानकारी भारत भाग्न तयार भएको पाइयो। किशोरीका आमा-बुवा सँग सम्पर्क गर्दा बर्दीवास प्रहरी चौकीमा खोजतलास को उजुरी दर्ता भएको खुलेको छ।

रेस्क्यू अभियानमा एएचटीयूका इन्सपेक्टर विकास कुमार, सहायक उपनिरीक्षक खेमराज, हवलदार अरविन्द द्विवेदी, महिला सिपाही शालिनी सिंह, सोनाली कुमारी, स्वच्छ रक्सौलका रणजीत सिंह र साबरा खातून सहभागी थिए। आरोपी समीर र नाबालिग किशोरीलाई थप कारबाहीका लागि वीरगन्जको इनारवा प्रहरी चौकीमा हस्तान्तरण गरिएको छ।

यो घटनाले सामाजिक सञ्जालको दुरुपयोग गरी सीमा क्षेत्रमा मानव तस्करी गर्ने गिरोहको सक्रियतामाथि गम्भीर प्रश्न उठाएको छ।