वीरगन्ज –
वीरगन्जको त्रिभुवन राजपथअन्तर्गतको मुख्य सडक विस्तारविरुद्ध परेको रिट निवेदनको सुनुवाइ आज (मंगलबार) पनि सर्वोच्च अदालतमा हुन सकेन। यो मुद्दा पुनः ‘हेर्न नभ्याइने’ सूचीमा राखिएको हो।
सडक विस्तारका कारण घरजग्गा गुम्ने भन्दै स्थानीय बासिन्दाले असार ३२ गते सर्वोच्च अदालतमा उत्प्रेषणको परमादेश माग गर्दै रिट दायर गरेका थिए। यसअघि साउन ७ गते भएको छलफलमा आजका लागि पेसी तोकिएको भए पनि सुनुवाइ फेरि स्थगित भएको हो।
वीरगन्ज महानगरपालिकाका कानुनी सल्लाहकार कमल मोहन पोखरेलका अनुसार सुनुवाइ स्थगित भएपछि सडक विस्तारको विषय अझै अनिश्चित बनेको छ।
रिट दायर गर्नेमा वीरगन्ज–१२ का शीवजी कलवार, वीरगन्ज–८ की सुशीला देवी रौनियार, वीरगन्ज–१२ की मनोती देवी रौनियार, वीरगन्ज–१६ का चन्द्रनारायण सिंह, वीरगन्ज–१० का राजकिशोर गुप्ता, वीरगन्ज–८ का गोविन्द प्रसाद अग्रवाल र राजेशकुमार रौनियार लगायत रहेका छन्।
यसअघि सडक विस्तारविरुद्ध परेको अन्य रिट भने सर्वोच्च अदालतले खारेज गरिसकेको छ।
