काठमाडौं —

नेकपा (एकीकृत समाजवादी)का सम्मानित नेता झलनाथ खनालले पतञ्जली जग्गा प्रकरणमा पार्टी अध्यक्ष माधवकुमार नेपालमाथि लागेको भ्रष्टाचार मुद्दाबारे आफूले सचिवालय बैठकमा राखेको प्रस्ताव बदलाको भावना वा सत्ताच्युत गर्ने उद्देश्यका लागि नभएको स्पष्ट गरेका छन्।

न्युज एजेन्सी नेपालसँग कुरा गर्दै खनालले अध्यक्ष नेपालमाथि १९ करोड रुपैयाँ बराबरको नीतिगत भ्रष्टाचारको मुद्दा लागेको स्मरण गराउँदै आफूले प्रस्ताव राख्नुको उद्देश्य नेपाललाई उक्त मुद्दाबाट अनुकुलता दिलाउन र कानुनी बचाउ प्रभावकारी बनाउन भएको बताए। “माधव कमरेडलाई कसरी बचाउने भन्ने सोचमा छु, उहाँलाई थप समस्या नहोस् भन्ने मेरो चाहना हो,” खनालको भनाइ छ।

खनालले मुद्दालाई व्यक्तिगत नभई पार्टीलाई समेत लागेको भन्नु गलत भएको टिप्पणी गर्दै नेताहरूलाई असैद्धान्तिक, अराजनीतिक र संवैधानिक मर्म विपरीतका अभिव्यक्ति नदिन आग्रह गरेका छन्। उनका अनुसार, आफ्नो प्रस्ताव माक्सवादी दृष्टिकोण र नयाँ राजनीतिक नजिर बसाल्ने प्रयत्न स्वरूप आएको हो।