काठमाडौँ-
प्रहरीले अवैध क्रिप्टोकरेन्सी कारोबारमा संलग्न भएको आरोपमा चार जनालाई पक्राउ गरेको छ। पक्राउ पर्नेमा दुई जना नेपाली र दुई जना भारतीय नागरिक रहेका छन्।
जिल्ला प्रहरी परिसर काठमाडौँका अनुसार ओमप्रकाश जयसवाल, मनमोहन कुमार सिंह, विक्रम जयसवाल र मुन्ना जयसवाललाई कालोपुलबाट नियन्त्रणमा लिइएको हो। उनीहरूको साथबाट प्रहरीले १५ लाख ३३ हजार रुपैयाँ नगद पनि बरामद गरेको छ।
प्रहरी प्रवक्ता एसपी अपील राज बोहराका अनुसार, अनुसन्धानमा उनीहरूले ६ करोड ६ लाख ६३ हजार ६८७ रुपैयाँ बराबरको क्रिप्टो कारोबार गरेको प्रमाण फेला परेको छ। नेपालमा क्रिप्टोकरेन्सीको कारोबार कानूनी रूपमा प्रतिबन्धित छ। प्रहरीले यस विषयमा थप अनुसन्धान जारी राखेको जनाएको छ।
