काठमाण्डौं –
समुद्रमा बगेको परिवारलाई बचाउन १३ वर्षीय बालकले चार घण्टासम्म ज्यान जोखिममा राख्दै समुद्रमा पौडिएको हृदयविदारक घटना अष्ट्रेलियामा सार्वजनिक भएको छ।
पश्चिमी अष्ट्रेलियाको क्विन्डालप नजिकै छुट्टी मनाइरहेका बेला तेज हावाले जोएन एप्पलबि र उनका तीन सन्तानलाई समुद्रतर्फ बगायो। स्थिति नियन्त्रणबाहिर गएपछि जोएनले आफ्ना १३ वर्षीय छोरा अस्टिनलाई सहयोग खोज्न पठाइन्।
अन्धकार, चिसो र उग्र छालबीच अस्टिनले करिब ४ किलोमिटर पौडिएर किनारामा पुग्दै आपतकालीन सेवामा खबर गर्यो। त्यसपछि सुरु भएको उद्धार अभियानले करिब १४ किलोमिटर टाढा समुद्रमा बगेको अवस्थामा आमा र दुई सन्तानलाई सकुशल उद्धार गर्यो।
रमाइलो घुमफिर क्षणमै संकटमा बदलियो
एप्पलबि परिवार पर्थबाट करिब २०० किलोमिटर दक्षिणमा पर्ने क्विन्डालपमा बिदा मनाइरहेका थिए। शुक्रबार दिउँसो जियोग्राफ बेमा उनीहरू इन्फ्लेटेबल प्याडलबोर्ड र कायकमा खेलिरहेका बेला अचानक तेज हावा चलेर समुद्रले उनीहरूलाई किनाराबाट टाढा बगायो।
जोएनका अनुसार सुरुवातमा यो “सानो रमाइलो” जस्तो देखिएको थियो। अस्टिन (१३), ब्यू (१२) र ग्रेस (८) सँग shallow पानीमा खेल्दै गर्दा बालबालिका अलि टाढा पुगे।
“हावा एकाएक बढ्यो, डुङ्गाका चप्पु हराए, र हामी झन् झन् टाढा बग्न थाल्यौं,” उनले बीबीसीसँग भनिन्।
‘के मैले गलत निर्णय गरेँ?’
सुरुमा किनारा नजिकै देखिएकाले जोएनले अस्टिनलाई सहयोग माग्न पठाइन्। तर अस्टिन पौडिँदै जाँदा उनीहरू झन् समुद्रतर्फ बग्दै गए र केही समयमै छोरालाई देख्न छाडे।
सूर्य अस्ताउँदै गयो, छाल अझ उग्र बन्यो। लाइफ ज्याकेट लगाएर बोर्ड समातिरहनु नै कठिन भयो।
“मैले सोचेकी थिएँ, अस्टिन छिट्टै किनारामा पुगिसक्छ,” जोएन भन्छिन्, “तर समय बित्दै जाँदा मनमा प्रश्न उठ्न थाल्यो—यदि ऊ पुग्न सकेन भने? के मैले गलत निर्णय गरेँ?”
४ किलोमिटर पौडिएर ज्यान जोगाए
तर अस्टिनले हार मानेन। उसले करिब ४ किलोमिटर समुद्रमा पौडिएर किनारामा पाइला टेकेको थियो।
“म आमाबारे, ब्यू र ग्रेसबारे सोच्दै थिएँ,” अस्टिन भन्छ, “किनारामा पुग्दा लाग्यो—यो सपना त होइन?”
किनारामा पुगेपछि उसले झोलाबाट मोबाइल निकालेर करिब साँझ ६ बजे आपतकालीन सेवामा फोन गर्यो।
“मैले भनेँ—मलाई हेलिकप्टर चाहियो, डुंगा चाहियो, मेरो परिवार समुद्रमा फसेको छ,” उसले सम्झियो।
त्यसपछि अत्यधिक थकानले ऊ बेहोस भयो र अस्पताल लगियो।
अन्धकार र चिसो समुद्रमा आमाको संघर्ष
समुद्रमा भने अवस्था झन् भयावह बन्दै थियो। अँध्यारो, चिसो र ठूलो छालबीच जोएन आफ्ना साना छोराछोरी सम्हाल्न संघर्ष गरिरहेकी थिइन्।
“मलाई लागिसकेको थियो—अस्टिन बाँच्न सकेन,” उनले भनिन्, “हामीलाई बचाउन कोही आइरहेको देखिँदैनथ्यो।”
खोजी टोलीले अन्ततः करिब १४ किलोमिटर टाढा समुद्रमा प्याडलबोर्ड समातेर बगेको अवस्थामा परिवारलाई फेला पार्यो। ठूलो छालले बोर्ड पल्टाउँदा बालबालिका छुट्टिँदा जोएनले ग्रेसको चिच्याहट सुनेकी थिइन्, तर ब्यूको आवाज सुन्न इन्जिन बन्द गरेपछि मात्र सम्भव भयो।
“त्यो पूर्ण रूपमा दुःस्वप्न थियो,” उनले भनिन्।
‘त्यो क्षण म कहिल्यै बिर्सन सक्दिन’
छोराछोरी र आमालाई जीवित फेला पारेको खबर पाउँदा अस्पतालमा रहेका डाक्टर र प्रहरीसमेत खुसीले उफ्रिएको अस्टिनले बताए।
“त्यो क्षण म जीवनभर बिर्सन सक्दिन,” उसले भन्यो।
परिवारका सबै सदस्यलाई सामान्य चोटपटकसहित अस्पतालमा उपचार गरिएको छ।
“सबै सुरक्षित, हाँसिरहेका र केवल थोरै दुखाइ मात्रै हुनु—यसभन्दा राम्रो अन्त्य के हुन सक्थ्यो र?” जोएनले भनिन्।
अस्टिन अहिले खुट्टा निकै दुखेकाले क्रचको सहारामा भए पनि विद्यालय फर्किसकेको छ।
“म नायक हुँ भन्ने लागेको छैन,” उसले भन्यो, “मैले गर्नुपर्ने काम मात्रै गरेँ।”
प्रहरीको प्रशंसा
प्रहरी निरीक्षक जेम्स ब्राड्लीले उद्धारमा संलग्न सबैलाई धन्यवाद दिँदै समुद्रको अवस्था छिट्टै बदलिन सक्ने चेतावनी दिए।
“१३ वर्षीय बालकको साहस र दृढता प्रशंसनीय छ। उसकै कारण आमाबुवा र दिदी–भाइको ज्यान बच्न सफल भयो,” उनले भने।
