रक्सौल / वीरगन्ज –
नेपाल र भारतबीचको अटुट सांस्कृतिक तथा आध्यात्मिक सम्बन्धलाई थप प्रगाढ बनाउने उद्देश्यका साथ आज सीमावर्ती सहर रक्सौलको पवित्र भूमिमा एक विशिष्ट आध्यात्मिक कार्यक्रम सम्पन्न भएको छ। विश्व ज्योतिष महासंघका एसिया उपसभापति तथा अन्तर्राष्ट्रिय ख्यातिप्राप्त ज्योतिष सम्राट डा. पुरुषोत्तम दुबेले वृन्दावनका प्रख्यात कथावाचक परम पूज्य अनिरुद्ध आचार्य जी महाराजलाई विशेष अभिनन्दन पत्रद्वारा सम्मानित गर्नुभएको छ।
यो भेटघाटले नेपाल-भारत मैत्रीको अटुट सनातन डोरीलाई पुनः पुष्टि गर्दै सनातन धर्मलाई दुई देशबीचको सबैभन्दा बलियो खम्बाको रूपमा स्थापित गरेको छ। अभिनन्दन कार्यक्रममा ज्योतिष सम्राट डा. दुबेले आचार्य जी महाराजको त्याग, समर्पण र आध्यात्मिक क्षेत्रमा पुर्याउनुभएको अतुलनीय योगदानको उच्च प्रशंसा गर्नुभयो।
अभिनन्दन पत्रमा उल्लेख गरिए अनुसार, आचार्य जीको मुखारविन्दबाट प्रवाहित हुने भागवत कथाले समाजमा भट्किएको युवा पुस्तालाई पुनः सनातन संस्कार र नैतिकताको मार्गमा फर्काउन ऐतिहासिक भूमिका निर्वाह गरेको छ। यस गरिमामय अवसरमा नेपाल र भारतका श्रद्धालुहरूको तर्फबाट बृहस्पति फाउन्डेसन, नेपालका प्रतिनिधि चन्दन पण्डित र हिन्दू जागरण समाज, नेपालका समाजसेवी विजय सर्राफले पनि आचार्य जीको भव्य स्वागत तथा अभिनन्दन गर्नुभएको थियो। समस्त राम-कृष्ण प्रेमी भक्तजनहरूको उपस्थितिमा सम्पन्न यो कार्यक्रमले सीमा क्षेत्रमा सनातन धर्म र संस्कृतिको संरक्षणमा एक नयाँ ऊर्जा थपेको छ।
