वीरगन्ज-
जिल्ला प्रहरी कार्यालय पर्साले आर्थिक अपराधविरुद्ध ठूलो सफलता हासिल गर्दै साढे दुई अर्ब रुपैयाँभन्दा बढीको अवैध हुण्डी कारोबारको सञ्जाललाई ध्वस्त पारेको छ। संगठित रूपमा अवैध रकम ओसारपसार र सम्पत्ति शुद्धीकरणमा संलग्न रहेको अभियोगमा वीरगन्जका ३२ वर्षीय प्रशान्त कुमार गुप्तालाई पर्सा जिल्ला अदालतले पुर्पक्षका लागि जेल चलान गरेको छ।
एसपी सुदीपराज पाठकको कमाण्डमा सूक्ष्म अनुसन्धान जिल्ला प्रहरी कार्यालय पर्साका प्रमुख, प्रहरी उपरीक्षक (एसपी) सुदीपराज पाठकको प्रत्यक्ष निर्देशन र कमाण्डमा खटिएको टोलीले विगत केही समयदेखि गुप्ताको गतिविधिमाथि सूक्ष्म निगरानी राखेको थियो। अनुसन्धानका क्रममा गुप्ताले भारतको रक्सौलबाट अवैध रूपमा हुण्डीको रकम नेपाल भित्र्याउने र त्यसलाई विभिन्न बैंक खाताहरूमा घुमाएर (लेयरिङ) वैध बनाउने ‘अपराधिक मास्टरप्लान’ सञ्चालन गरिरहेको फेला पारेको हो।
डिजिटल ‘लेयरिङ’ को खुलासा एसपी पाठकका अनुसार पक्राउ परेका गुप्ताले परम्परागत हुण्डी मात्र नभई आधुनिक डिजिटल माध्यमहरू चेक, फोनपे र मोबाइल बैंकिङको प्रयोग गरी रकमको स्रोत लुकाउने प्रयास गरेका थिए। “विभिन्न व्यक्तिका नाममा रहेका खाताहरू प्रयोग गरी रकम ट्रान्सफर गर्ने र डिजिटल प्रणालीलाई नै अवैध कारोबारको हतियार बनाउने गरेको पुष्टि भएको छ,” एसपी पाठकले बताउनुभयो।
साढे २ अर्बको बिगो र कारबाही प्रहरीले गत पुस १७ गते ३३ लाख नगदसहित गुप्तालाई नियन्त्रणमा लिएको थियो। लामो अनुसन्धानपछि प्रहरीले २ अर्ब ४१ करोड ७८ लाख रुपैयाँ बिगो कायम गरेको छ, जसमा गुप्ता एक्लैको संलग्नता १ अर्ब ७९ करोडभन्दा बढी देखिएको छ। अनुसन्धान प्रतिवेदनका आधारमा सम्मानित अदालतले माघ २८ गते उनलाई कारागार पठाउने आदेश दिएको हो।
आर्थिक अपराधविरुद्ध पर्सा प्रहरीको कडा कदम यस घटनाको सफल अनुसन्धान र कानुनी प्रक्रियाले सीमावर्ती क्षेत्रमा हुने संगठित आर्थिक अपराधमा संलग्नहरूलाई ठूलो धक्का पुगेको छ। एसपी पाठकले अवैध आर्थिक कारोबार र हुण्डी सञ्जाललाई जरैदेखि उखेल्न पर्सा प्रहरीको अभियान अझै सशक्त रूपमा अघि बढ्ने चेतावनी दिनुभएको छ। यो सफलताले बैंकिङ प्रणालीको दुरुपयोग रोक्न र कानुनी राज्यको प्रत्याभूति दिलाउन प्रहरीको भूमिकालाई जनस्तरमा प्रशंसित बनाएको छ।
