वीरगन्ज —
पर्साको सखुवाप्रसौनी गाउँपालिकाका अध्यक्ष जसवन्त यादव सरकारी सवारीसाधनसहित क्यासिनोमा भेटिएपछि प्रहरीको नियन्त्रणमा परेका छन्।
शनिबार राति पर्सा प्रहरीले सञ्चालन गरेको विशेष अभियानका क्रममा वीरगन्जस्थित गण्डकको क्लार्क रिसोर्ट होटलमा रहेको क्यासिनोबाट अध्यक्ष यादवसहित ८ जनालाई नियन्त्रणमा लिइएको हो। सो क्रममा गाउँपालिकाको ना.१ झ १६८७ नम्बरको सरकारी स्कोर्पियो गाडी समेत क्यासिनो परिसरबाट प्रहरीले कब्जामा लिएको छ।
नेपालमा नेपाली नागरिकलाई क्यासिनो प्रवेशमा कानुनी प्रतिबन्ध रहेको अवस्थामा सार्वजनिक पदमा रहेका जनप्रतिनिधि सरकारी सवारीसाधन प्रयोग गरी क्यासिनो पुग्नुलाई प्रहरीले गम्भीरताका साथ लिएको छ। जिल्ला प्रहरी कार्यालय पर्साका डीएसपी चक्रबहादुर मल्लका अनुसार पक्राउ परेका व्यक्तिहरूको पहिचान तथा घटनाबारे विस्तृत अनुसन्धान भइरहेको छ।
अध्यक्ष यादव क्यासिनोभित्र के-कति कारणले पुगेका थिए र उनको संलग्नता के थियो भन्नेबारे प्रहरी अनुसन्धानपछि मात्रै वास्तविक तथ्य बाहिर आउनेछ। घटनाबारे थप विवरण आइतबार प्रेस विज्ञप्तिमार्फत सार्वजनिक गरिने प्रहरीले जनाएको छ।
सरकारी स्रोतसाधनको प्रयोग र जनप्रतिनिधिको मर्यादालाई लिएर स्थानीय स्तरमा चासो र बहस सिर्जना भएको छ। अनुसन्धानको अन्तिम निष्कर्षपछि मात्र घटनाको आधिकारिक स्थिति स्पष्ट हुनेछ।
