काठमाडौं-
प्रधान सेनापति महारथी अशोक राज सिग्देलले लगनखेलस्थित खेल मैदानमा आयोजित प्रधान सेनापति ट्रफी–२०८३ खेलकुद प्रतियोगिताको उद्घाटन गरेका छन् ।
नेपाली सेनाभित्र रहेका प्रतिभावान् खेलाडीको पहिचान गरी उनीहरूको खेलकौशल विकास गर्दै राष्ट्रिय तथा अन्तर्राष्ट्रियस्तरका खेलाडी उत्पादन गर्ने उद्देश्यले वि.सं. २०६५ सालदेखि प्रधान सेनापति ट्रफी प्रतियोगिता सञ्चालन हुँदै आएको हो ।
यस वर्षको प्रतियोगितामा एथलेटिक्स, स्विमिङ, बक्सिङ, तेक्वान्दो, भलिबल, बास्केटबल, फुटबल र जुडो गरी आठ विधा समावेश गरिएको छ । प्रतियोगितामा नेपाली सेनाका पृतना तथा बाहिनीका १४ टोली सहभागी छन् ।
प्रतियोगिताअन्तर्गत आज सम्पन्न ५ किलोमिटर दौडमा महिलातर्फ मध्य पूर्वी पृतनाकी प्यूठ निर्मला के.सी. विजेता बनेकी छन् । पुरुषतर्फ उत्तर पश्चिम पृतनाका सिपाही अर्जुन बुढा विजेता बन्नुभएको छ। विजेता खेलाडीहरूलाई प्रधान सेनापति महारथी अशोक राज सिग्देलले पुरस्कार वितरण गरेका थिए ।
उद्घाटन समारोहमा रथीवृन्द, अधिकृत, निर्णायक मण्डल तथा विभिन्न विधामा सहभागी खेलाडीहरूको उपस्थिति रहेको थियो ।
