जनकपुर–
नेपाली काँग्रेसका सभापति शेरबहादुर देउवाले मधेस प्रदेशको नाम जनक वा जानकी राखेमा उत्तम हुने बताएका छन्। शुक्रबार जनकपुरमा आयोजित एक कार्यक्रमलाई सम्बोधन गर्दै उनले जनकपुरको ऐतिहासिक, धार्मिक र सांस्कृतिक महत्त्वलाई जोड दिँदै यस्तो विचार व्यक्त गरे।
देउवाले जनकपुरलाई राजा जनकको राजधानी, जानकी माताको जन्मस्थल र भगवान् रामले धनुष तोडेर सीतासँग स्वयंवर गरेको पौराणिक स्थलका रूपमा उल्लेख गरे। उनले भने, “जनकपुर अत्यन्तै ऐतिहासिक, धार्मिक र महत्त्वपूर्ण ठाउँ हो। यहाँ विकसित मैथिली भाषा बोलिन्छ। राजा जनक सानो राजा होइनन्, उनको पहिचान सिंगापुर, मलेसिया र कम्बोडियासम्म फैलिएको छ। थाइल्याण्डका राजालाई समेत जनकको सन्तान मानिन्छ। मधेस प्रदेशको नाम जनक वा जानकी राखेको भए राम्रो हुन्थ्यो।”
उनले जनकपुरको सांस्कृतिक समृद्धि र मैथिली भाषाको विशिष्टतामाथि प्रकाश पार्दै यस क्षेत्रको पौराणिक महत्त्वलाई अन्तर्राष्ट्रिय स्तरमा समेत मान्यता प्राप्त भएको बताए। सभापति देउवाको यो भनाइले मधेस प्रदेशको नामकरणबारे फेरि एकपटक चर्चा सुरु भएको छ।
