वीरगन्ज-
वीरगन्जको अस्पतालहरूमा केही दिनअघि मात्रै असामान्य भीड देखिन्थ्यो। डिहाइड्रेसनले थलिएका बालबालिकादेखि लिएर कमजोर बुढाबुढीसम्मका मुहार चिन्ताले भरिएका थिए। तर पछिल्ला दिनमा भने त्यही वार्डमा मुस्कान फर्कन थालेको छ।
बिहीबार मात्र ८४ जना नयाँ बिरामी भर्ना भए पनि, त्यसमध्ये १७७ जना उपचारपछि निको भएर घर फर्किनु आशाको खबर बनेको छ। “पहिले दिनहुँ बढिरहेको संख्या अब घट्दै गएको छ, यो सकारात्मक संकेत हो,” वीरगन्ज महानगर स्वास्थ्य शाखाका अधिकृत सुमनचन्द्र ठाकुर भन्छन्।
गत हप्ता तीन जनामात्र हैजा संक्रमित भेटिँदा सामान्य लागेको थियो। तर, त्यसयता संख्या बढ्दै बिहीबार साँझसम्म १४३ पुगेको छ। यद्यपि अहिले उपचाररत बिरामी घट्दै जानु नियन्त्रणतर्फको संकेत भएको स्वास्थ्यकर्मी बताउँछन्।
हालसम्म ६१२ जना बिरामीमध्ये ४३४ जना पूर्ण निको भएर घर फर्किसकेका छन्। बाँकी १७८ जना अस्पतालमा उपचाररत छन्। तीमध्ये ६९ जनामा हैजाको सङ्क्रमण पुष्टि भएको छ।
यसबीच, महानगरको वातावरण निरीक्षक प्रकाश ऐर नेतृत्वको टोलीले धारा–धाराबाट पानी संकलन गरी परीक्षणलाई तीव्र बनाएको छ। दूषित पानी नै रोगको प्रमुख स्रोत भएको अनुमान गर्दै टोलीले स्रोत पत्ता लगाउने प्रयासलाई निरन्तरता दिएको छ।
स्वास्थ्यकर्मीहरू भने अझै सतर्क रहन आग्रह गर्छन्। “पानी उमालेर पिउनुहोस्, खाना स्वच्छ राख्नुहोस्, र कुनै लक्षण देखिए ढिलो नगरी अस्पताल जानुहोस्,” उनीहरूको सन्देश छ।
हिजोमात्र त्रसित बनेका वीरगञ्जका बासिन्दा आज भने राहतको सास फेर्न थालेका छन्। महामारीले दिएको पीडामाथि नियन्त्रणको किरण देखिन थालेसँगै शहरमा फेरि सामान्य जीवनतर्फ फर्किने आशा पलाउँदै गएको छ।
