सर्लाही-
जिल्लाको ईश्वरपुर नगरपालिका स्थित खिलामा बिहीबार राति तीनवटा मोटरसाइकल एकआपसमा ठोक्किँदा दुई युवाको ज्यान गएको छ भने अन्य दुई जना घाइते भएका छन्।
भारतमा दर्ता भएका मोटरसाइकलहरू आपसमा ठोक्किँदा हरिपुर्वा नगरपालिका-९ मिर्चैयाका मुकेश राय र रामज्ञान रायको घटनास्थलमै मृत्यु भएको जिल्ला प्रहरी कार्यालयका प्रवक्ता सरोज राईले जानकारी दिए।
दुर्घटनामा सोही स्थानका विक्रम राय र रामविश्वास राय घाइते भएका छन्। उनीहरूलाई लालबन्दीस्थित मोडल अस्पतालमा प्रारम्भिक उपचारपछि प्रहरीले नियन्त्रणमा लिएको छ। दुर्घटनामा संलग्न तीनवटै मोटरसाइकलसमेत कारबाहीका लागि नियन्त्रणमा लिइएको प्रहरीले जनाएको छ।
बढ्दो सडक दुर्घटना : जिम्मेवार बन्नु सबैको दायित्व
यस प्रकारका दुर्घटनाले सडक सुरक्षाबारे गम्भीर प्रश्न उठाइरहेका छन्। तीव्र गति, हेल्मेटको प्रयोगमा लापरबाही, रातिको समयमा सावधानी नअपनाउनु तथा ट्राफिक नियमको बेवास्ता दुर्घटनाका मुख्य कारणका रूपमा देखिँदै आएका छन्।
सम्बन्धित निकायले ट्राफिक सचेतना अभियानलाई थप प्रभावकारी बनाउनुपर्ने आवश्यकता औंल्याइँदै आएको छ भने नागरिक स्वयंले पनि सुरक्षित यात्रा संस्कृतिलाई प्राथमिकता दिनुपर्ने देखिन्छ।
सडक सुरक्षा केवल नियमको विषय होइन, जीवन जोगाउने सामूहिक जिम्मेवारी हो।
