काठमाडौं –
अमेरिकासँग हुने भनिएको सम्भावित शान्ति वार्ताको पूर्वतयारीका लागि इरानको उच्चस्तरीय टोली पाकिस्तानको राजधानी इस्लामाबाद पुगेसँगै कूटनीतिक हलचल तीव्र बनेको छ।
इरानको सरकारी सञ्चारमाध्यमका अनुसार रणनीतिक महत्व बोकेको यो भ्रमण वार्ताको आधार तयार पार्ने उद्देश्यसहित अघि बढाइएको हो। बीबीसी हिन्दीले पनि पाकिस्तानको विदेश मन्त्रालयलाई उद्धृत गर्दै इरानी प्रतिनिधिमण्डल इस्लामाबाद आइपुगेको पुष्टि गरेको जनाएको छ।
स्थानीय सञ्चारमाध्यमहरूका अनुसार टोलीलाई नूर खान अन्तर्राष्ट्रिय विमानस्थल मा औपचारिक स्वागत गरिएको थियो, जहाँ उच्च तहका पाकिस्तानी अधिकारीहरूको उपस्थिति देखिएको थियो।
प्रतिनिधिमण्डलको नेतृत्व इरानी संसदका सभामुख मोहम्मद बगर गालिबाफ ले गरिरहेका छन्। उनीसँगै विदेशमन्त्री अब्बास अराघची, राष्ट्रिय सुरक्षा संरचनाका प्रमुख अली अकबर अहमदियान, केन्द्रीय बैंकका गभर्नर अब्दुलनासिर हेम्मती लगायतका प्रभावशाली व्यक्तिहरू सहभागी छन्।
उक्त टोलीलाई पाकिस्तानका उपप्रधानमन्त्री तथा विदेशमन्त्री इसहाक डार ले स्वागत गरेका थिए। स्वागत समारोहमा राष्ट्रिय सभाका सभामुख सरदार अयाज सादिक, सेना प्रमुख सैयद आसिम मुनीर तथा गृहमन्त्री मोहसिन रजा नक्वी को उपस्थिति उल्लेखनीय रह्यो।
इरान-अमेरिका सम्बन्ध लामो समयदेखि तनावपूर्ण रहँदै आएको सन्दर्भमा सम्भावित वार्ताको तयारीका लागि भएको यो गतिविधिले क्षेत्रीय मात्र होइन, अन्तर्राष्ट्रिय शक्ति सन्तुलनमा पनि नयाँ संकेत दिन सक्ने भन्दै विश्व समुदायले चासोपूर्वक हेरिरहेको छ।
