वीरगन्ज-
देशभर चर्किरहेको जेनजी आन्दोलनको लहरबीच कानुन, न्याय तथा संसदीय मामिला मन्त्री तथा नेपाली कांग्रेसका नेता अजय चौरसियाको वीरगन्जस्थित निवासमा तोडफोड भएको छ।
स्थानीय स्रोतका अनुसार प्रदर्शनकारीहरूको एक समूहले मन्त्री चौरसियाको घर अगाडि नाराबाजी गर्दै ईँटा र ढुंगा प्रहार गरेका थिए। यस क्रममा घरको गेट र झ्यालमा क्षति पुगेको बताइएको छ। घटनापछि ठूलो संख्यामा प्रहरी परिचालन गरी स्थिति नियन्त्रणमा लिने प्रयास गरिएको छ।
यसअघि सोमबार प्रहरीले प्रदर्शनकारीमाथि गोली चलाउँदा १९ जना युवाको मृत्यु भएपछि देशभर आक्रोशित आन्दोलन तीव्र बनेको हो। सरकारको मौनता, दमनको शैली, र नागरिकको आवाजलाई दबाउने प्रयासप्रति असन्तुष्ट जनाउँदै युवा पुस्ता सडकमा उत्रिएका छन्।
राजनीतिक नेतृत्व र सत्तारूढ दलका शीर्ष नेताहरूको घर तथा कार्यालयहरू प्रदर्शनकारीहरूको निशानामा परिरहेका छन्। केही दिनअघि वीरगन्जमै एमाले पार्टी कार्यालयमा समेत आगजनी भएको थियो।
सुरक्षा अवस्था तनावग्रस्त
वीरगन्जमा अहिले उच्च सतर्कता अपनाइएको छ। प्रमुख राजनीतिक व्यक्तित्वहरूको सुरक्षा बढाइएको छ भने स्थानीय प्रशासनले थप सुरक्षाकर्मी खटाएको छ।
सरकारको प्रतिक्रिया अझै आउन बाँकी
युवाहरूको आक्रोश र चर्को विरोधबीच सरकारले अझै आधिकारिक प्रतिक्रिया सार्वजनिक गरेको छैन। आन्दोलनमा परी ज्यान गुमाएका नागरिकप्रति शोक र जिम्मेवारी नदेखाएको भन्दै सरकारमाथि आलोचना बढ्दै गएको छ।
