जनकपुरधाम –

मधेश प्रदेशमा पछिल्लो समय हत्याका घटनामा वृद्धि भएसँगै सुरक्षा चुनौती चुलिएको छ। चालु आर्थिक वर्ष २०८२/०८३ को पहिलो ६ महिनाको अवधिमा मात्रै प्रदेशका ८ जिल्लामा ५६ जनाले ज्यान गुमाएका छन्। पछिल्लो ४८ घण्टाभित्रै भएका तीनवटा हत्याका घटनाले सर्वसाधारणमा थप त्रास फैलाएको छ।

चुनावी माहोल तातिरहेका बेला भएका यी श्रृंखलाबद्ध घटनाहरू प्रत्यक्ष रूपमा चुनावसँग सम्बन्धित नदेखिए पनि यसले आम नागरिकमा भय र संशयको वातावरण सिर्जना गरेको छ।

तथ्यांकमा मधेशको स्थिति

मधेश प्रदेश प्रहरी कार्यालय, जनकपुरधामका अनुसार चालु आवको पुस मसान्तसम्म ज्यान गुमाउने ५६ जनामध्ये पुरुषको संख्या बढी छ।

• पुरुष: २६ जना

• महिला: १८ जना

• बालबालिका: १२ जना (९ बालक र ३ बालिका)

जिल्लागत रूपमा हेर्दा सप्तरी सबैभन्दा बढी प्रभावित देखिएको छ। त्यहाँ १३ जनाको हत्या भएको छ, जसमा ५ पुरुष, ६ महिला र १–१ जना बालक/बालिका रहेका छन्। यस्तै धनुषा र सिरहामा समान ९–९ जनाको हत्या भएको प्रहरी तथ्यांकले देखाउँछ।

जिल्लागत विवरण (चालु आवको ६ महिना)

किन हुँदैछन् हत्याका घटना?

प्रहरीका अनुसार हत्याका पछाडि राजनीतिक भन्दा पनि व्यक्तिगत र सामाजिक कारणहरू बढी जिम्मेवार देखिएका छन्। एक प्रहरी अधिकारी भन्छन्, “पारिवारिक विवाद, आपसी रिसइबी, सामाजिक सञ्जालको दुरुपयोग र लागूऔषधको कुलत नै यी घटनाका मुख्य कारक हुन्।”

विगतको तुलनामा ट्रेण्ड

गत आर्थिक वर्ष २०८१/०८२ मा कुल ९९ जनाको हत्या भएको थियो। त्यसअघि आव २०८०/०८१ मा १२७ र आव २०७९/०८० मा १०९ जनाको हत्या भएको प्रहरीको तथ्यांक छ। चालु वर्षको ६ महिनामै ५६ पुग्नुले सुरक्षा व्यवस्थामा थप सतर्कता अपनाउनुपर्ने संकेत गरेको छ।