वीरगन्ज–
नेपालमा हालै आएको जलविद्युत् र बाढीको महाविपत्तिपछि राहत तथा पुनर्निर्माणका लागि विश्वकै अग्रणी प्रविधि कम्पनी एनभिडिया (NVIDIA) र त्यसका प्रमुख कार्यकारी अधिकृत (सीईओ) जेन्सेन हुआङले १० मिलियन अमेरिकी डलर (करिब १ अर्ब ५३ करोड नेपाली रुपैयाँ) सहयोग प्रदान गरेका छन्।
‘प्रधानमन्त्री दैवी प्रकोप उद्धार कोष’मा जम्मा भएको यो रकम निजी क्षेत्र तथा कुनै पनि विश्वव्यापी प्रविधि कम्पनीबाट नेपाल सरकारले विपद् व्यवस्थापनका लागि प्राप्त गरेको अहिलेसम्मकै सबैभन्दा ठूलो सहयोग हो। अर्थमन्त्री डा. स्वर्णिम वाग्लेले उक्त ठूलो रकम कोषमा प्राप्त भइसकेको पुष्टि गर्दै एनभिडिया कम्पनी र सीईओ हुआङप्रति हार्दिक आभार व्यक्त गरेका छन्।
नेपाली कर्मचारीहरूको सराहनीय पहल
यो ऐतिहासिक सहयोग जुटाउन एनभिडियामा कार्यरत नेपाली अधिकारी अशोक पाण्डे र आरती न्यौपानेसहितका नेपाली कर्मचारीहरूले मुख्य भूमिका खेलेका थिए। पाण्डेको नेतृत्वमा नेपाली टोलीले नेपालमा बाढीले पुर्याएको क्षति र मानवीय सङ्कटको भयावह अवस्थाबारे कम्पनीको उच्च व्यवस्थापनलाई विस्तृत जानकारी गराएका थिए।
त्यसैगरी सहयोग रकम सरकारी कोषमा ल्याउने प्रक्रियामा अर्थमन्त्री डा. वाग्ले र एनभिडियाकी नेपाली अधिकारी न्यौपानेबीच समन्वय गराउन गैरआवासीय नेपाली संघ (एनआरएनए) का पूर्वकोषाध्यक्ष हिक्मत थापाले विशेष पहल गरेका थिए। न्यौपानेले यसअघि नाइजेरियामा रहँदा पनि नेपालको भूकम्प प्रभावितहरूका लागि राहत सङ्कलनमा सक्रिय भूमिका निर्वाह गरेकी थिइन्।
पुनर्निर्माणका लागि ४ देखि ५ अर्ब डलर आवश्यक
अर्थमन्त्री डा. वाग्लेका अनुसार नेपालमा पछिल्लो बाढी-पहिरोका कारण ठूलो पूर्वाधार र मानवीय क्षति भएको छ, जसको पूर्ण पुनर्निर्माणका लागि ४ देखि ५ अर्ब अमेरिकी डलरसम्म आवश्यक पर्न सक्छ। यस्तो कठिन परिस्थितिमा एआई (AI) र सेमिकन्डक्टर प्रविधिको विश्वकै शीर्ष कम्पनी एनभिडिया र सीईओ हुआङले दिएको यो रकमले पीडितको राहत, पुनःस्थापना र भौतिक पुनर्निर्माणमा महत्त्वपूर्ण योगदान पुर्याउने अपेक्षा गरिएको छ।
