काठमाडौँ-
राष्ट्रिय प्रजातन्त्र पार्टी (राप्रपा)को भ्रातृ संगठन प्रजातान्त्रिक युवा संगठनले आज गणतन्त्रको विरोधमा विरोध प्रदर्शन गरेको छ। संगठनले राजसंस्थाको पक्षमा राँके जुलुससहित साँझ सुकेधाराबाट चाबहिलसम्म प्रदर्शन गरेको हो। प्रदर्शनका क्रममा राजतन्त्रको पक्षमा चर्को नाराबाजी गरिएको थियो।
यसैबीच, नेपाली कांग्रेसका नेता रामहरि खतिवडाले केही दिनअघि दिएको अभिव्यक्तिको विरोध गर्दै उनको पुत्ला जलाइएको छ। खतिवडाले ‘हामी राजालाई बम हान्ने पार्टीका कार्यकर्ता हौँ’ भन्ने अभिव्यक्ति दिएका थिए। यसलाई लिएर राप्रपाका केन्द्रीय आन्दोलन परिचालन समितिका सदस्य राजु लोहनीले खतिवडाले पूर्वराजालाई धम्क्याउने काम गरेको आरोप लगाएका छन्।
लोहनीले पूर्वराजालाई जिस्क्याउने काम बन्द गर्न चेतावनी दिँदै नवीन समझदारीबाट राजालाई पनि ठाउँ खाली गरिनुपर्ने धारणा राखेका छन्। उनले चैतका लागि राप्रपाले आन्दोलनको बिगुल फुकिसकेको बताउँदै अहिलेको व्यवस्था विफल भएकाले राजतन्त्रको विकल्प नभएको तर्क गरेका छन्।
युवक संगठनका सदस्य सचिव नीराजन बमले पनि राजा फर्काउनुको विकल्प नभएको बताएका छन्। यस कार्यक्रममा लोहनी र बमसहितका नेता तथा कार्यकर्ताहरूको सहभागिता रहेको थियो।
यस प्रदर्शनले राजतन्त्रको पक्षमा बढ्दो रुझानलाई इङ्गित गरेको छ भने गणतन्त्रको विरोधमा विभिन्न राजनीतिक दलहरूबीच तनाव बढेको देखिन्छ।
