काठमाडौं –

जल तथा मौसम विज्ञान विभागको बाढी पूर्वानुमान महाशाखाले आज सोमबार देशका ४७ जिल्ला र आसपासका क्षेत्रमा बाढीको जोखिम रहेको जनाएको छ। साथै, २२ जिल्लामा एल्लो वार्निङ जारी गरिएको छ।

महाशाखाका अनुसार इलाम, काभ्रे, काठमाडौं, ललितपुर, भक्तपुर, चितवन, मकवानपुर, नवलपरासी (पूर्व र पश्चिम), बारा, पर्सा, पाल्पा, गुल्मी, अर्घाखाँची, रुपन्देही, कपिलवस्तु, कास्की, स्याङ्जा, पर्वत, तनहुँ, दैलेख, सुर्खेतलगायतका जिल्लामा बहने स–साना नदीहरूमा बहाव उल्लेख्य बढ्ने र आकस्मिक बाढीको मध्यम जोखिम रहेको छ।

यस्तै, झापा, संखुवासभा, सोलुखुम्बु, ताप्लेजुङ, पाँचथर, खोटाङ, ओखलढुंगा, रामेछाप, दोलखा, सिन्धुपाल्चोक, नुवाकोट, धादिङ, दाङ, रुकुम (पूर्व र पश्चिम), जाजरकोट, कालिकोट, डोटी, अछाम, बझाङ, बैतडी, दार्चुला, कैलालीलगायतका जिल्लाका स–साना नदीहरूमा पनि बहाव बढ्ने पूर्वानुमान छ।

आज बिहानको मापनअनुसार कोशी, कर्णाली, नारायणी, महाकाली, कमला, वागमती, पूर्वी राप्ती, पश्चिम राप्ती, र बबई नदीहरूको बहाव सतर्कता तहभन्दा तल र सामान्य अवस्थामा रहेको छ। तर, कन्काई र यसका सहायक नदीहरूको बहाव भने सतर्कता तहको आसपास पुगेको महाशाखाले जनाएको छ।

महाशाखाले जोखिम क्षेत्रका बासिन्दालाई सतर्क रहन र आवश्यक सावधानी अपनाउन आग्रह गरेको छ।