काठमाडौँ-

खानेपानीमन्त्री प्रदीप यादवले मन्त्रालय सम्हालेको एक वर्षमा खानेपानी क्षेत्रमा उल्लेखनीय प्रगति भएको दाबी गर्नुभएको छ। मेलम्चीको पानी असोज २२ गतेदेखि काठमाडौँ उपत्यकामा नियमित आपूर्ति, दैनिक ६ करोड लिटरभन्दा बढी पानी वितरण, र चक्रपथ बाहिर पाँच प्याकेजमा खानेपानी विस्तारको खरिद प्रक्रिया अघि बढेको छ।

नेपाल खानेपानी संस्थानको विनियमावली २०८१ जारी गरी पदपूर्ति प्रक्रिया पुनः सुरु, भारत र इसिमोडसँग अन्तरराष्ट्रिय साझेदारी, स्पेनमा पानी र सरसफाइ वित्तपोषण कार्यक्रममा सहभागिता, र ऊर्जा मन्त्रालयसँग पानीको बहुपक्षीय उपयोग सम्झौता गरिएको छ।

झापा, वीरगन्ज, पोखरालगायत सहरमा एकीकृत खानेपानी र ढल व्यवस्थापन आयोजना, बारा–पर्सामा २५०+ डिप बोरिङ निर्माण, र रु ४.५ अर्बको वीरगञ्ज बृहत खानेपानी योजना कार्यान्वयनमा छ। सुनकोशी–मरिन डाइभर्सनमार्फत तराईका ६ जिल्लामा दीर्घकालीन खानेपानी पूर्वाधार विकास, सुन्दरीजलमा २५.५ करोड लिटर क्षमताको प्रशोधन केन्द्र, र कीर्तिपुर–महाँकालचौरमा ट्याङ्की निर्माण अघि बढेको छ।

खानेपानी नियमावली २०८१ लागू, सहलगानी शुल्क ३०% बाट १५% मा झारिएको, रु १२ अर्ब बजेट सहमति, ८६% पुँजीगत खर्च, र काठमाडौँमा १,७०० किमि पाइपलाइन विस्तार भएको छ। बाढीले क्षति पुगेका ५२५ आयोजना पुनःस्थापना, ८६ आयोजना सम्पन्न, र जाइकाको सहयोगमा पोखरा खानेपानी सुधार आयोजना पूरा भएको छ। यी कार्यबाट १५ लाख नागरिक लाभान्वित हुने मन्त्रालयको विश्वास छ।