वीरगन्ज –
तिहारको समापनसँगै तराईका गाउँ–सहरहरूमा अहिले छठ पर्वको रौनक छाएको छ । सूर्य भगवान र छठी माताको आराधनाको यो पर्व आउँदै गर्दा मधेशका सहर, बजार र बस्तीहरू उत्सवमय बनेका छन् ।
चार दिनसम्म चल्ने छठ पर्व देशकै प्रमुख धार्मिक पर्वमध्ये एक मानिन्छ । यस पर्वको स्वागतका लागि मिथिलाञ्चलका पोखरी, तलाउ र नदीघाटहरूमा अहिले सरसफाइ, मर्मत र सजावट तीव्र गतिमा भइरहेको छ । श्रद्धालुहरूले पूजा गर्ने घाटहरूमा खाल्डाखुल्डी पुर्ने, बाटो मर्मत गर्ने, बत्ती झिलिमिली र फुलमाला सजाउने काम धमाधम भइरहेको छ ।
वीरगन्ज, जनकपुर, बिर्तामोड, राजविराजदेखि नेपालगञ्जसम्मका सहरहरूमा अहिले छठको उल्लास र आस्थाको तरंग छ । घर आँगनदेखि बजारसम्म विशेष सफाइ र तयारीले मधेशका बासिन्दाको निष्ठा र समर्पण झल्काउँछ ।
मिथिलासहित तराई मधेशमा पुस्तौँदेखि श्रद्धा, आस्था र परम्पराको प्रतीकका रूपमा मनाइँदै आएको यो पर्वमा श्रद्धालुहरूले सूर्य भगवानलाई अस्ताउँदै र उदाउँदा अर्घ अर्पण गर्दै ब्रत बस्ने परम्परा छ ।
पर्व नजिकिँदै गर्दा बजारमा पूजाका सामग्री, फलफूल र मिष्टान्न खरिद गर्ने भीड बढ्न थालेको छ । प्रशासनले पनि भीडभाडमा सुरक्षाको व्यवस्था कडा पारेको छ ।
