काठमाडौँ –
जनता समाजवादी पार्टी (जसपा) भित्र आगामी राजनीतिक यात्राबारे असहमति गहिरिँदै गएको छ। पार्टी नेताहरू बीच एकताको मोडेल र आगामी रणनीति बारे निर्णय नहुँदा जसपा पुनः निर्णायक मोडमा पुगेको छ।
दुई वर्षअघि जसपा नेपालबाट अलग भएर गठन भएको जसपा अहिले फेरि राजनीतिक दिशानिर्देशनको विषयमा दुई धारमा विभाजित देखिन्छ।
एक पक्ष नेकपासँग सहकार्यको तयारीमा
राजेन्द्र श्रेष्ठ, अध्यक्ष अशोक राई र केही शीर्ष नेताहरू नेपाली कम्युनिस्ट पार्टी (नेकपा) तर्फ राजनीतिक सहकार्य वा एकताको सम्भावना तलाश गरिरहेका छन्।
नेता श्रेष्ठले आइतबार नेकपा नेतृत्वसँग भेटवार्ता गरेका थिए भने यसअघि अध्यक्ष राईसहितका नेताहरूले पनि नेकपा अध्यक्ष पुष्पकमल दाहाल ‘प्रचण्ड’सँग छलफल गरेका थिए।
सोमबार बसेको पार्टी कार्यकारिणी बैठकमा श्रेष्ठ र पशुराम बस्नेतले नेकपासँग एकतामुखी राजनीतिमा अघि बढ्नुपर्ने धारणा प्रस्तुत गरेका थिए।
अर्को पक्ष – ‘पहिचान पक्षधर दलसँगै एकता आवश्यक’
मधेशी मूलका नेताहरू भने मधेशवादी र पहिचान आधारित दलहरूसँग एकता गर्नुपर्नेमा जोड दिइरहेका छन्।
महासचिव इस्तियाक राई र उपमहासचिव प्रदीप यादवले मधेशसँग प्रत्यक्ष सरोकार राख्ने दलहरूसँग मिलेर अगाडि बढ्नु उचित रहेको बताएका छन्।
उपमहासचिव यादवले भने,
“जसपा मधेश, आदिवासी जनजाति र पहिचानका मुद्दाबाट बनेको दल हो। त्यसैले एकता पनि त्यही धारमा हुने दलसँग हुनुपर्छ। गठबन्धन भने परिस्थितिअनुसार अरू दलसँग पनि गर्न सकिन्छ।”
एकताको प्रस्तावहरू प्राप्त
जसपाले हालसम्म विभिन्न राजनीतिक दलबाट एकताको प्रस्ताव पाएको छ। जसपा नेपालका उपाध्यक्ष राजकिशोर यादवले पनि सम्मानपूर्वक एकता गर्ने प्रस्ताव राखिसकेको छ।
त्यस्तै, राष्ट्रिय मुक्ति पार्टी नेपालले पनि लिखितरूपमै एकताको आग्रह गरेको स्रोतले बताएको छ।
अदालतको मुद्दा अझै विचाराधीन
जसपा विभाजन प्रकरणको विवाद राजनीतिसँगै कानुनी तहमा पनि पुगेको छ। पार्टी विभाजनविरुद्ध जसपा नेपालका अध्यक्ष उपेन्द्र यादवले दायर गरेको रिट दुई वर्षपछि पनि सर्वोच्च अदालतमा विचाराधीन छ।
यसले पार्टीको भविष्य राजनीतिक मात्र नभई कानुनी प्रक्रियामा पनि निर्भर भइरहेको देखिन्छ।
आगामी चुनाव मुख्य टर्निङ–प्वाइन्ट
जसपाका नेताहरूले आगामी चुनावलाई लक्षित गरेर राजनीतिक विकल्प खोजिरहेको बताएका छन्। पार्टीले एक्लै चुनावमा जाने सम्भावना न्यून देखिएको छ।
कुन दलसँग एकता वा गठबन्धन गर्ने भन्नेबारे चाँडै निष्कर्षमा पुग्नुपर्ने पार्टी नेताहरूको मत रहेको छ।
जसपा अहिले महत्वपूर्ण राजनीतिक मोडमा उभिएको छ। नेताहरूबीच संवाद जारी रहेको र पार्टीले सामूहिक निर्णयमार्फत हुने एकताको मोडेल तय गर्ने अपेक्षा गरिएको छ।
आगामी दिनमा जसपाको निर्णयले मधेशसहित राष्ट्रिय राजनीतिमा नयाँ समीकरण बन्ने विश्लेषकोंको अनुमान छ।
