काठमाडौं-
नेपाली काँग्रेसले आफ्नो १५औँ महाधिवेशन भदौ २४ देखि २६ गतेसम्म काठमाडौंमा गर्ने प्रस्ताव अघि सारेको छ। पार्टी सभापति गगन थापाले सानेपास्थित केन्द्रीय कार्यालयमा सुरु भएको केन्द्रीय समिति बैठकमा उक्त मिति औपचारिक रूपमा प्रस्ताव गरेका हुन्।
महाधिवेशनलाई लक्षित गर्दै पार्टीले सदस्यता व्यवस्थापनलाई तीव्र बनाउने योजना पनि अघि बढाएको छ। प्रस्तावअनुसार चैत २१ गतेदेखि महिनाको अन्त्यसम्म विशेष अभियान सञ्चालन गरी क्रियाशील सदस्यता अद्यावधिक गरिनेछ। त्यसपछि वैशाख महिनाभर देशभरका ६ हजार ७४३ वडाबाट सदस्यता वितरण र नवीकरण प्रक्रिया अघि बढाइने तयारी छ।
यसैगरी, जेठ मसान्तसम्म सबै सदस्यता विवरण केन्द्रमा पठाइसक्ने र असार १५ गतेभित्र केन्द्रले आवश्यक छानबिन पूरा गरी अन्तिम टुंगो लगाउने कार्ययोजना बनाइएको छ।
पार्टीभित्र संगठन सुदृढीकरण र नेतृत्व चयनको महत्वपूर्ण अवसरका रूपमा हेरिएको यो महाधिवेशनले कांग्रेसको भावी दिशा तय गर्ने अपेक्षा गरिएको छ।
