पर्सा-
पर्सामा ‘शिक्षा पत्रकार समूह’ औपचारिक रुपमा गठन गरिएको छ। नेपाल पत्रकार महासंघ पर्साको सभाकक्षमा शनिबार आयोजित कार्यक्रममा नेपाल पत्रकार महासंघ पर्साका अध्यक्ष ओमप्रकाश खनालले प्रमोद यादवलाई अध्यक्ष बनाउँदै नयाँ समिति घोषणा गरेका हुन्।
नवगठित समितिमा उपाध्यक्ष राजेन्द्र सिंह नेपाली, सचिव माधुरी महतो, सहसचिव बलिराम यादव र कोषाध्यक्ष राजकुमारी यादव चयन भएका छन्। त्यस्तै, आंशु सर्राफ, विनोद यादव, अनिता कुँवर र एन्जल चौधरी सहित अन्य सदस्यहरू चयन गरिएको छ। समूहमा शंकर आचार्य, तुलसी भण्डारी, भूषण यादव, क्रान्ति शाह र विजय महतोलाई सल्लाहकारको भूमिकामा मनोनित गरिएको छ।
कार्यक्रममा सहभागी वक्ताहरूले पत्रकारिता र शिक्षाबीचको सम्बन्ध, शिक्षाको विकास, विद्यालयहरूको अवस्था र चुनौतीबारे धारणा राखे।
नेपाल शिक्षक महासंघ पर्साका अध्यक्ष तीर्थराज यादवले सामुदायिक विद्यालयको भौतिक संरचना विगतको तुलनामा सुधार भए पनि विषयगत शिक्षक अभाव र राजनीतिक हस्तक्षेपका कारण शैक्षिक गुणस्तर अपेक्षित रूपमा उकासिन नसकेको बताए।
उनले पछिल्लो समय शिक्षकहरू ‘युट्युबर दबाब’ तथा अनावश्यक निगरानीमा परेको उल्लेख गर्दै यस्तो अवस्थाले पठन–पाठनमा नकारात्मक असर परेको दाबी गरे।
उपप्राध्यापक डा. सुष्मा तिवारीले २०४६ सालपछि शिक्षामा पहुँच विस्तार भए पनि राज्यको लगानी उल्टै घट्दै गएको चिन्ता व्यक्त गरिन्। उनका अनुसार मधेस प्रदेशको साक्षरता दर मात्र ६९ प्रतिशत छ, जुन सातै प्रदेशमध्ये सबैभन्दा कम हो।
डा. तिवारीले पर्सा र वीरगन्जका सामुदायिक विद्यालयहरूमा शिक्षकको अभाव, शौचालय, अपांगता–मैत्री वातावरण, कमजोर पूर्वाधार र प्रयोगमा नआएका कम्प्युटर जस्ता समस्या अझै चुनौतीको रूपमा रहेको बताइन्।
कार्यक्रम समूहका अध्यक्ष प्रमोद यादवको अध्यक्षता तथा शिक्षा विकास तथा समन्वय इकाइ पर्साका प्रमुख मोती प्रसाद भट्टराइको प्रमुख आतिथ्यमा सम्पन्न भएको थियो। कार्यक्रममा शिक्षक महासंघ वीरगन्जका अध्यक्ष प्रदीप जयसवाललगायतको उपस्थिति रहेको थियो।
