वीरगन्ज –
“तपाईंले संसारमा देख्न चाहने परिवर्तन आफैं बन्नुहोस्” भन्ने सिद्धान्तलाई आत्मसाथ गर्दै दुई युवा विद्यार्थीहरूले समाजमा सकारात्मक परिवर्तन ल्याउने उद्देश्यले निःशुल्क शिक्षा अभियान सुरु गरेका छन्। गुनगुन सहनी (हाल डिप्लोमा इन सिभिल इन्जिनियरिङ अध्ययनरत) र आकाश गुप्ता (हाल बीबीएस प्रथम वर्ष अध्ययनरत) ले आर्थिक रूपमा कमजोर तथा मजदुरी गरेर जीविकोपार्जन गर्ने परिवारका बालबालिकाहरूलाई वीरगन्ज महानगरपालिका अन्तर्गत गहवा मन्दिर अगाडिको पार्कमा बिगत १० दिन देखि निःशुल्क शिक्षा प्रदान गरिरहेका छन्।
यी दुई युवाहरूले कक्षा १० मा सँगै पढेका हुन्, र उनीहरूले शिक्षाको महत्व र समाजमा यसको प्रभावबारे गहिरो चासो राख्छन्। उनीहरूले आफ्नो पहलमार्फत विद्यालय जान नसकेका वा आर्थिक अभावका कारण शिक्षाबाट वञ्चित बालबालिकाहरूलाई आधारभूत शिक्षा प्रदान गर्दै उनीहरूको भविष्य उज्ज्वल बनाउने प्रयास गरिरहेका छन्।
गुनगुन र आकाशले आफ्नो कार्यक्रममा बालबालिकाहरूलाई शिक्षाप्रति आकर्षित गर्न कपी, कलम, र चक्लेहरु जस्ता शैक्षिक सामग्रीहरू पनि निःशुल्क वितरण गर्दै छन्। उनीहरूको यो पहलले स्थानीय समुदायलाई पनि प्रेरित गरिरहेको छ। स्थानीय बासिन्दाहरूले यस कार्यलाई सराहना गर्दै उनीहरूलाई आवश्यक सहयोग पुर्याउन आह्वान गरेका छन्।
यी युवाहरूले प्रतिदिन बिहान ४:३० बजे देखि साँझ ६ बजे सम्म निःशुल्क कक्षा संचालन गर्दै आएका छन्। उनीहरूको यो प्रयासले न केवल बालबालिकाहरूलाई शिक्षाको महत्वबारे जागरूक बनाउँदै छ, समाजमा शिक्षाको प्रसारमा पनि ठूलो भूमिका खेलिरहेको छ।
स्थानीय समुदायले यी युवाहरूको प्रयासलाई उच्च सम्मान गर्दै यस्ता पहलहरूलाई अझ बढाउन सहयोगको हात अगाडि बढाउन आग्रह गरेको छ। गुनगुन र आकाश जस्ता युवाहरूको समर्पण र लगनशीलताले समाजमा सकारात्मक परिवर्तन ल्याउन सकिन्छ भन्ने कुरा पुष्टि गर्दै आम जनमानसले यसलाई सराहना गरेका छन्।
यी युवाहरूको प्रयासले न केवल बालबालिकाहरूको जीवनमा नयाँ आशा किरण बनेको छ, समाजमा शिक्षाको महत्वलाई पनि अझ बलियो बनाएको छ। उनीहरूको यो पहलले अन्य युवाहरूलाई पनि समाजसेवामा अग्रसर हुन प्रेरणा दिने अपेक्षा गरिएको छ।
