चितवन –

चितवन जिल्लाको नारायणगढ–मुग्लिन सडक खण्डअन्तर्गत भरतपुर महानगरपालिका–२९, सिमलतालमा मंगलबार राति साढे १० बजे एउटा भारतीय मिनी ट्रक अनियन्त्रित भई त्रिशूली नदीमा खस्दा दुई जना घाइते भएका छन्।

भारतको लखनउबाट मेवा बोकेर काठमाडौँतर्फ आउँदै गरेको यूपी ३२ जेटएन ७८८३ नम्बरको मिनी आइचर ट्रक सडकबाट करिब ८० मिटर तल त्रिशूली नदीको किनारमा खसेको हो। यो दुर्घटनामा ट्रकका चालक २१ वर्षीय आशिक यादव र सहचालक २० वर्षीय उत्तर सिंह घाइते भएका छन्।

जिल्ला प्रहरी कार्यालय चितवनका प्रहरी नायब उपरीक्षक रविन्द्र खनालले दिएको जानकारीअनुसार दुर्घटना रातको समयमा भएको र ट्रक अनियन्त्रित भएर सडकबाट तल खसेको थियो। घाइते दुवै जनालाई तत्काल उद्धार गरी भरतपुर अस्पतालमा उपचारका लागि लगिएको छ। प्रहरीका अनुसार दुवैको स्वास्थ्य अवस्था सामान्य छ र उनीहरूको उपचार भइरहेको छ।

यो सडक खण्डमा बारम्बार यस्ता दुर्घटना हुने गरेकोले सवारी चालकहरूलाई सावधानी अपनाउन प्रहरीले आग्रह गरेको छ।