वीरगन्ज-
मधेश प्रदेशसभाको बैठक प्रतिपक्षी दलहरूको अवरोधका कारण छैटौँ दिन पनि स्थगित भएको छ। आगामी आर्थिक वर्ष २०८२/८३ को बजेटमाथि छानबिन गर्न गठित कार्यदलमा भौतिक पूर्वाधार विकास मन्त्री सरोजकुमार यादवको नाम समावेश गरिएकोमा प्रतिपक्षी दलहरूले विरोध जनाउँदै शनिबारको बैठक अवरुद्ध गरेका हुन्।

बैठकमा सभामुख रामचन्द्र मण्डलले बजेटमाथिको छलफलका लागि अर्थमन्त्री सुनिलकुमार यादवलाई जवाफ दिन अनुमति दिएपछि प्रतिपक्षी सांसदहरूले रोस्ट्रम घेराउ गरे। त्यसपछि सभामुखले बैठक १० मिनेटका लागि स्थगित गरेका थिए। माओवादी नेता युवराज भट्टराईले बजेटमा त्रुटि सच्याउन सभामुखको संयोजकत्वमा गठित कार्यदलप्रति असहमति जनाउँदै विरोध गरे।

छानबिन कार्यदलमा मन्त्री सरोजकुमार यादवको नाम समावेश भएकोमा ६ वटा प्रतिपक्षी दलले आपत्ति जनाएका छन्। कार्यदलबाट मन्त्रीको नाम नहटाएसम्म सदन अवरोध गर्ने अडान उनीहरूको छ। सभामुख मण्डलले कार्यदलमा मन्त्रीको नाम राख्नु उपयुक्त नभए पनि अल्पमतमा रहेको सरकारलाई समेटेर कार्यदल गठन गर्नु नयाँ अभ्यास भएको बताए। समय अभावका कारण उनले कार्यदलको संयोजक पदबाट राजीनामा दिएका छन्।

कार्यदलमा जनता समाजवादी पार्टी नेपालका प्रमुख सचेतक राम अशिष यादव, माओवादी सांसद जवाहरलाल कुशवाहा, नेकपा (एकीकृत समाजवादी) का प्रमुख सचेतक कनिष पटेल, सत्तापक्षबाट एमालेका संसदीय दलका नेता एवं मन्त्री सरोजकुमार यादव र नेपाली कांग्रेसका संसदीय दलका नेता कृष्ण यादव सदस्य छन्।