काठमाडौँ –
मध्यपूर्वमा चर्किंदो युद्ध अब ऊर्जा क्षेत्रमा प्रत्यक्ष आक्रमणमा परिणत भएको छ। संयुक्त अरब इमिरेट्स ले इरान द्वारा गरिएका आक्रमणलाई “खतरनाक उक्साहट” भन्दै कडा निन्दा गरेको छ।

यूएईका अनुसार हबशन ग्यास प्रशोधन केन्द्र र बाब तेल क्षेत्रमा इरानी आक्रमण भएपछि सम्भावित क्षति रोक्न ग्यास उत्पादन बन्द गरिएको छ। अबु धाबी का अधिकारीहरूले यसलाई क्षेत्रीय युद्धको खतरनाक विस्तारको संकेत बताएका छन्।

कतारमा मिसाइल वर्षा, ठूलो क्षति

यसैबीच कतार पनि इरानी आक्रमणबाट अछुतो रहेन। कतारको रक्षा मन्त्रालयका अनुसार इरानी मिसाइलहरूले रस लाफान औद्योगिक सहरलाई निशाना बनाउँदा ठूलो क्षति भएको छ।

यो आक्रमण त्यतिबेला भएको हो, जब इजरायल ले इरानको दक्षिण पार्स ग्यास क्षेत्रमा प्रहार गरेको थियो। दक्षिण पार्स विश्वकै सबैभन्दा ठूलो ग्यास क्षेत्र मानिन्छ, जसलाई इरान र कतारले संयुक्त रूपमा प्रयोग गर्दै आएका छन्।

इरानको कडा चेतावनी

इरानले आफ्नो ऊर्जा क्षेत्रमा भएको आक्रमणको प्रतिशोधस्वरूप थप कडा कदम चाल्ने संकेत दिएको छ। इरानी रिभोल्युसनरी गार्डले चेतावनी दिँदै भनेको छ, “यदि हमला दोहोरियो भने, तपाईं र तपाईंका सहयोगीहरूको ऊर्जा संरचना पूर्ण रूपमा नष्ट नभएसम्म हाम्रो आक्रमण रोकिन्न।”

यसले अब युद्ध ऊर्जा संरचनामै केन्द्रित हुने स्पष्ट संकेत दिएको छ।

साउदी अरेबियामा पनि खतरा

साउदी अरेबिया ले आफ्नो पूर्वी क्षेत्रमा ऊर्जा पूर्वाधार लक्षित ड्रोन आक्रमण विफल पारेको जनाएको छ। साथै रियाद नजिकैको रिफाइनरी क्षेत्रमा ब्यालिस्टिक मिसाइलका अवशेष खसेको पुष्टि भएको छ।

विश्व अर्थतन्त्रमा असरको चिन्ता

ऊर्जा क्षेत्रमा लक्षित आक्रमण बढ्दै जाँदा विश्वभर इन्धन आपूर्ति प्रभावित हुने र मूल्य अस्थिरता चर्किने जोखिम बढेको छ। विज्ञहरूका अनुसार यदि द्वन्द्व अझ फैलियो भने यसको असर विश्व अर्थतन्त्रमै गम्भीर रूपमा पर्न सक्छ।स्रोतः The Guardian