जनकपुरधाम –
शान्त शहर मानिने जनकपुरधाममा गएराति भएको एक हिंसात्मक घटनाले स्थानीयवासीलाई त्रसित बनाएको छ। उपमहानगरपालिका–१९ मुजेलियास्थित पेट्रोल पम्पमै अज्ञात समूहले खुकुरी प्रहार गर्दा दुई जना गम्भीर घाइते भएका छन्।
घाइते हुनेमा कुम्हरौडा निवासी करिब २७ वर्षीय अजय झा र उनका भिनाजु बकचौडा निवासी करिब ४० वर्षीय सोनु कुमार झा रहेका छन्। उनीहरू राति मोटरसाइकलमा पेट्रोल भर्न मुजेलिया पुगेका थिए। तर, त्यहीँ अचानक मोटरसाइकलमै आएका केही युवाहरूको समूहले उनीहरूमाथि आक्रमण गरेको प्रत्यक्षदर्शीले बताएका छन्।
स्थानीयका अनुसार आक्रमणकारीहरू नशाको प्रभावमा थिए र उनीहरूले कुनै विवादबिना नै अन्धाधुन्ध रूपमा खुकुरी प्रहार गरेका थिए। आक्रमण यति अचानक र हिंस्रक थियो कि वरपरका मानिसहरू समेत आतंकित बनेका थिए।
गम्भीर घाइते दुवै जनालाई तत्काल उपचारका लागि अस्पताल लगिएको छ। प्रारम्भिक उपचारपछि उनीहरूलाई जनकपुरधामस्थित काव्या अस्पतालमा रिफर गरिएको छ, जहाँ उनीहरूको उपचार जारी रहेको बताइएको छ।
घटनालगत्तै प्रहरी घटनास्थलमा पुगेर अनुसन्धान सुरु गरेको छ। जिल्ला प्रहरी कार्यालय धनुषाका अनुसार आक्रमणमा प्रयोग गरिएको बा. प्रदेश ०२–०५७ प–४१४० नम्बरको केटीएम मोटरसाइकल नियन्त्रणमा लिइएको छ। तर, आक्रमणकारीहरू भने अझै फरार छन् र उनीहरूको खोजी तीव्र पारिएको प्रहरीले जनाएको छ।
यस घटनाले जनकपुरधाममा बढ्दो आपराधिक गतिविधिप्रति गम्भीर प्रश्न उठाएको छ। स्थानीयवासीहरूले राति हिँडडुल गर्न असुरक्षित महसुस गर्न थालेको भन्दै शान्ति सुरक्षा कडाइका साथ कायम गर्न प्रहरी प्रशासनसँग माग गरेका छन्।
पीडित परिवारले दोषीलाई तत्काल पक्राउ गरी कडा कारबाही गर्न माग गर्दै न्यायको अपिल गरेका छन्। जनकपुरधाममा भएको यो घटनाले अब सुरक्षाको सवाललाई पुनः केन्द्रमा ल्याएको छ।
