शंकर गणश/रक्सौल
भारतीय मुस्लिम युवाहरूले हिन्दु किशोरीहरूलाई “लभ जिहाद” को जालमा फसाएर सीमा पार गराउने र नेपाललाई सुरक्षित आश्रयस्थलका रूपमा प्रयोग गर्ने क्रम बढ्दो देखिएको छ। यसै सिलसिलामा, एक हिन्दु किशोरीलाई प्रेम जालमा फसाएर नेपाल पुर्याई भारततर्फ तस्करी गर्न खोज्ने भारतीय युवा मोहम्मद साहिल अन्सारीलाई सीमा सुरक्षा बल (SSB) ले रक्सौलबाट पक्राउ गरेको छ।
पूर्वी चम्पारण, बिहारको हरसिद्धि निवासी अन्सारीले सोही ठाउँकी एक नाबालिग हिन्दु किशोरीलाई विगत ७–८ महिनादेखि फोनमार्फत प्रलोभनमा पारेका थिए। उनले किशोरीलाई विवाहको झुटा आश्वासन दिएर तीन दिनअघि नेपाल भगाएर ल्याएका थिए। नेपालको एक भाडाको कोठामा राखेर किशोरीको धर्म परिवर्तन गराउने प्रयास समेत भएको अनुसन्धानमा खुलेको छ।
घटनाको प्रकृति हेर्दा भारतीय अपराधीहरूले नेपालको खुल्ला सीमा र खुकुलो प्रशासनको फाइदा उठाउँदै नेपाललाई ‘सेफ हाउस’ (सुरक्षित गृह) का रूपमा प्रयोग गरिरहेको पाइएको छ। ती युवकले किशोरीलाई नेपाल ल्याएर केही दिन लुकाएको र त्यसपछि अहमदाबाद (गुजरात) लैजान लाग्दा रक्सौलको मैत्री पुल नजिकै शङ्का लागेर चेकजाँच गर्दा उनीहरू फेला परेका हुन्।
उद्धार गरिएकी किशोरीको बयान अनुसार, आरोपीको प्रभावमा परेर उनले रोजा राख्न र इस्लामिक धर्म मान्न सुरु गरिसकेकी थिइन्। सुरुवातमा किशोरीले अन्सारीले सिकाएका कुराहरू मात्र दोहोर्याए पनि मानव तस्करी विरुद्ध कार्यरत संस्था र महिला सुरक्षाकर्मीहरूको काउन्सिलिङपछि उनले आफूलाई फसाइएको खुलासा गरेकी हुन्।
एएचटीयू (AHTU), एसएसबी र विभिन्न सामाजिक संस्थाहरूको सक्रियताले यो मानव तस्करी र ‘लभ जिहाद’ को योजना विफल भएको छ। किशोरीका परिवारले यसअघि नै भारतको हरसिद्धि थानामा उजुरी (FIR नं. २२२/२६) दर्ता गराइसकेका थिए। पक्राउ परेका अन्सारी र किशोरीलाई थप कानुनी कारबाहीका लागि हरैया थाना, रक्सौलमा बुझाइएको छ।
नेपाल-भारत सीमा क्षेत्रमा यस्ता गतिविधि बढ्नुले दुवै देशका सुरक्षा निकायका लागि चुनौती थपिदिएको छ। विशेष गरी हिन्दु किशोरीहरूलाई लक्षित गरी भइरहेका यस्ता योजनाबद्ध घटनाहरूले सीमावर्ती क्षेत्रमा त्रास र सतर्कता दुवै बढाएको छ।
