पोखरा विमानस्थलमा ‘कमिसन उडान’ ? अख्तियारले खोल्यो अर्को भ्रष्टाचारको फाइल
काठमाडौं-
राष्ट्रिय गौरवको आयोजना भनेर प्रचार गरिएको पोखरा अन्तर्राष्ट्रिय विमानस्थल फेरि भ्रष्टाचारको दलदलमा तानिएको छ । निर्माण सकिएपछि पनि विवाद नटुंगिएको विमानस्थल अब उच्च तहका पूर्वमन्त्री, सचिव र विदेशी कम्पनीसम्म तानिने कानुनी घेराबन्दीमा परेको छ ।
अख्तियार दुरुपयोग अनुसन्धान आयोगले विमानस्थल निर्माणका क्रममा ठेक्का सम्झौताको शर्त विपरीत ठेकेदार कम्पनीलाई राजश्व छुट दिइएको भन्दै पूर्वअर्थमन्त्री ज्ञानेन्द्रबहादुर कार्कीसहित १४ जनाविरुद्ध विशेष अदालतमा भ्रष्टाचार मुद्दा दायर गरेको हो ।
विशेष अदालतका प्रवक्ता कृष्णशरण लामिछानेका अनुसार राज्यलाई अर्बौं रुपैयाँ नोक्सानी पुर्याइएको दाबी गर्दै अख्तियारले ३ अर्ब ६२ करोड ५ लाख २२ हजार १६० रुपैयाँ बिगो मागदाबी गरेको छ । यो रकमले फेरि एकपटक “विकास कि कमिसन ?” भन्ने पुरानै प्रश्नलाई सतहमा ल्याइदिएको छ ।
मुद्दामा तत्कालीन अर्थसचिव शंकरप्रसाद अधिकारी, पर्यटन सचिव महेश्वर न्यौपाने, सहसचिव सुरेश आचार्य र दुण्डुराज घिमिरे, पूर्वसचिव केवल भण्डारी, नागरिक उड्डयन प्राधिकरणका तत्कालीन महानिर्देशक सञ्जिव गौतम, निवर्तमान महानिर्देशक प्रदीप अधिकारीलगायत उच्च पदस्थ कर्मचारीहरूलाई प्रतिवादी बनाइएको छ ।
त्यति मात्रै होइन, विमानस्थल निर्माणको जिम्मा पाएको चिनियाँ कम्पनी सीएएमसी, उसका अध्यक्ष, परियोजना व्यवस्थापक र कम्पनी म्यानेजरसमेत अख्तियारको निशानामा परेका छन् ।
पोखरा विमानस्थलमा भ्रष्टाचार सम्बन्धी यो तेस्रो मुद्दा हो । यसअघि गत मंसिरमा पाँच पूर्वमन्त्रीसहित विरुद्ध मुद्दा दर्ता भएको थियो भने चैतमा अर्को भ्रष्टाचार प्रकरण अदालत पुगेको थियो । लगातारका मुद्दाले विमानस्थल निर्माण प्रक्रिया सुरुदेखि नै प्रश्नको घेरामा रहेको संकेत गरेका छन् ।
अर्बौं खर्चिएर बनाइएको विमानस्थल उडानभन्दा बढी विवादका कारण चर्चामा आउन थालेपछि अब जनस्तरमा प्रश्न उठ्न थालेको छ— “पोखरामा विमानस्थल बन्यो कि भ्रष्टाचारको रनवे ?”
