विकास र वातावरणलाई सन्तुलनमा राख्न वातावरणीय अध्ययन प्रतिवेदन स्वीकृति प्रक्रियालाई सरल बनाउन नियमावली संशोधन गरिने जानकारी दिए।

काठमाडौँ-

सरकारले जलवायु परिवर्तन र वातावरण संरक्षणका लागि प्लास्टिक झोला नियन्त्रण सम्बन्धी कार्य योजना कार्यान्वयन गर्ने भएको छ। सोमबार प्रतिनिधिसभामा बजेटमाथिको मन्त्रालयगत छलफलमा सांसदहरूले उठाएका प्रश्नको जवाफ दिँदै वन तथा वातावरणमन्त्री ऐनबहादुर शाहीले यो कुरा बताएका हुन्।

मन्त्री शाहीले यसअघि निर्माण भएको प्लास्टिक झोला नियन्त्रण कार्य योजनालाई प्रभावकारी रूपमा कार्यान्वयन गरिने प्रतिबद्धता व्यक्त गरे। उनले विकास र वातावरणलाई सन्तुलनमा राख्न वातावरणीय अध्ययन प्रतिवेदन स्वीकृति प्रक्रियालाई सरल बनाउन नियमावली संशोधन गरिने जानकारी दिए।

यसैगरी, कार्बन व्यापारलाई व्यवस्थित गर्न ‘कार्बन व्यापार नियमावली’ तर्जुमा अन्तिम चरणमा पुगेको मन्त्री शाहीले बताए। जलवायु परिवर्तन र वातावरण संरक्षणका लागि अन्तर्राष्ट्रिय जलवायु वित्त र प्रविधिमा नेपालको पहुँच वृद्धि गर्ने मन्त्रालयको योजना रहेको उनले उल्लेख गरे।