मुजफ्फरपुर–
भारतको बिहार राज्यस्थित मुजफ्फरपुर जिल्लाको ब्रह्मपुरा थाना क्षेत्रमा रहेको ‘प्रसाद हस्पिटल’ मा आज बिहानै भीषण आगलागी भएको छ। अस्पतालको आईसीयू (ICU) वार्डबाट सुरु भएको आगलागीका कारण सम्पूर्ण अस्पताल परिसर धुवाँले भरिँदा १० जनाभन्दा बढी बिरामीको मृत्यु भएको दाबी गरिएको छ।
घटनाका क्रममा २० जनाभन्दा बढी बिरामीलाई उद्धार (रेस्क्यु) गरी बाहिर निकालिएको छ, जसमध्ये केहीको अवस्था निकै गम्भीर रहेको जनाइएको छ। आगलागीको सूचना पाउनासाथ दमकल विभागका करिब एक दर्जन गाडीहरू घटनास्थल पुगेर राहत तथा उद्धार कार्य सुरु गरेका थिए।
अस्पतालका कर्मचारी फरार भएको आरोप
घटनास्थलमा उपस्थित बिरामीका आफन्तहरूले अस्पताल प्रशासनमाथि गम्भीर लापरबाहीको आरोप लगाएका छन्। एक प्रत्यक्षदर्शी आफन्तका अनुसार उनका बुबा आईसीयूमा भर्ना थिए र आगलागीका कारण उनको मृत्यु भयो। घटना लगत्तै अस्पतालका सम्पूर्ण कर्मचारी र चिकित्सकहरू बिरामीलाई अलपत्र छाडेर फरार भएको र शव समेत उपलब्ध नगराएको आफन्तहरूको गुनासो छ।
नियन्त्रण बाहिरको धुवाँ र उद्धार
अग्निशमन अधिकारी आर.एन. पाण्डेका अनुसार बिहान करिब ३ बजे अस्पतालमा आगो लागेको सूचना प्राप्त भएको थियो। दमकलको टोली घटनास्थल पुग्दा आईसीयू वार्ड पूर्ण रूपमा बाक्लो धुवाँले भरिइसकेको थियो।
“हामी पुग्दा अस्पतालका अधिकांश कर्मचारी गायब भइसकेका थिए,” अधिकारी पाण्डेले भने, “हाम्रो टोलीले विन्डो र ढोकाहरू फुटाएर २० जनाभन्दा बढी बिरामीलाई सुरक्षित बाहिर निकालेको छ। स्थानीय स्तरबाट १० जनाको मृत्यु भएको सूचना आएको छ।”
हाल घटनास्थलमा राहत र बचाउ कार्य जारी रहेको छ भने स्थानीय प्रशासनले घटनाको अनुसन्धान सुरु गरेको छ। मृतकको संख्याबारे आधिकारिक पुष्टि हुन बाँकी रहेको भारतीय सञ्चारमाध्यमहरूले जनाएका छन्।
