वीरगन्ज–
जिल्ला प्रहरी कार्यालय पर्सा र सशस्त्र प्रहरी बलको संयुक्त टोलीले पर्साको जगरनाथपुरबाट ठुलो परिमाणमा प्रतिबन्धित लागूऔधष गाँजा बरामद गरेको छ । विशेष सूचनाको आधारमा खटिएको सुरक्षाकर्मीको टोलीले शनिबार जगरनाथपुर गाउँपालिका वडा नं. ३ मुरैया चोकस्थित खेतबाट सो गाँजा बरामद गरेको हो ।
प्रहरीका अनुसार खेतमा पाँच वटा चामलको बोराभित्र लुकाईछिपाई राखेको अवस्थामा कुल १ सय केजी लागूऔषध गाँजा फेला परेको थियो । शङ्कास्पद रूपमा राखिएका ती बोराहरू जाँच गर्दा गाँजा पुष्टि भएपछि प्रहरीले रीतपूर्वक बरामद गरेको जिल्ला प्रहरी कार्यालय पर्साले जनाएको छ ।
जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक (डीएसपी) हरिबहादुर बस्नेतका अनुसार बरामद गरिएको उक्त लागूऔषध गाँजा ओसारपसार र भण्डारणमा संलग्न व्यक्तिहरूको पहिचान खुलिसकेको छैन । प्रहरीले उक्त घटनासँग सम्बन्धित फरार व्यक्तिहरूको खोजी कार्य तीव्र बनाउनुका साथै घटनाबारे थप अनुसन्धान अगाडि बढाएको छ ।
