चितवन–
राष्ट्रिय स्वतन्त्र पार्टी (रास्वपा) को चितवनमा जारी प्रथम ऐतिहासिक महाधिवेशनको चौथो दिन आज (बुधबार) नयाँ नेतृत्व चयनका लागि मतदान प्रक्रिया सुरु भएको छ। केन्द्रीय निर्वाचन आयोगका प्रमुख भुवन केसीका अनुसार बुधबार बिहान ९ बजेबाट मतदान सुरु भएको हो। हिजो राति बन्दसत्र सम्पन्न भएसँगै निर्वाचन आयोगले मतदानको कार्यतालिका सार्वजनिक गरेको थियो।
प्रधानमन्त्री बालेन शाहको प्रस्तावमा रवि निर्विरोध
महाधिवेशनले पार्टीका संस्थापक सभापति रवि लामिछानेलाई पुनः आगामी कार्यकालका लागि पनि सर्वसम्मत रूपमा सभापति पदमा निर्विरोध निर्वाचित गरेको छ। सभापति पदका लागि मनोनयन दर्ता गर्ने निर्धारित अवधिभित्र लामिछानेको मात्र एकल उम्मेदवारी परेकाले उनी निर्विरोध निर्वाचित भएको निर्वाचन आयोगले घोषणा गरेको हो।
विशेष कुरा त के छ भने, लामिछानेलाई सभापतिमा निर्वाचित गरियोस् भनी पार्टीका वरिष्ठ नेता एवं प्रधानमन्त्री वालेन्द्र (बालेन) शाहले प्रस्ताव गर्नुभएको थियो। लामिछानेले २०७९ साल असार ७ गते रास्वपाको स्थापना गरी राजनीतिक यात्रा सुरु गर्नुभएको थियो।
बन्दसत्रमा ६ वटा महत्त्वपूर्ण प्रतिवेदन पारित
प्रतिनिधि छनोटमा देखिएको केही विवादका कारण सोमबारका लागि तय भएको बन्दसत्र झन्डै एक दिन ढिला गरी मंगलबार दिउँसो मात्र सुरु भएको थियो। बन्दसत्रमा पार्टीको आगामी वैचारिक र सङ्गठनात्मक दिशा तय गर्न ६ वटा महत्त्वपूर्ण प्रतिवेदनहरू पेस भई पारित भएका छन्:
- राजनीतिक प्रतिवेदन: सभापति रवि लामिछाने
- अर्थ राजनीतिक प्रस्ताव: उपसभापति डा. स्वर्णिम वाग्ले
- सङ्गठनात्मक प्रतिवेदन: महामन्त्री कवीन्द्र बुर्लाकोटी
- विधान संशोधन प्रतिवेदन: सहमहामन्त्री विपिन आचार्य
- लेखा प्रतिवेदन: कोषाध्यक्ष लिमा अधिकारी
- अनुशासन आयोगको प्रतिवेदन: रमाकान्त रिमाल
९९ केन्द्रीय सदस्यका लागि प्रतिस्पर्धा
सभापति पदको टुङ्गो निर्विरोध रूपमा सल्टिए पनि अब बाँकी ९९ जना केन्द्रीय सदस्य चयनका लागि भने निर्वाचन प्रक्रिया सुरु भइसकेको छ।
उम्मेदवारी मापदण्ड: केन्द्रीय सदस्य पदमा प्रतिस्पर्धा गर्नका लागि उम्मेदवारहरूले २१ हजार रुपैयाँ मनोनयन शुल्क बुझाएका छन्। यसका साथै प्रत्येक उम्मेदवारले आफ्नो मनोनयन दर्ता गर्दा १ जना प्रस्तावक र २१ जना समर्थकको पूर्ण विवरण पार्टीको निर्वाचन आयोगमा बुझाउनुपर्ने कडा कार्यविधि तय गरिएको छ।
डिजिटल प्रविधि र मोबाइल एपमार्फत समेत भोट हाल्ने व्यवस्था मिलाइएको यस निर्वाचनको अन्तिम परिणाम आजै रातिसम्म आइसक्ने निर्वाचन आयोगले जनाएको छ।
