काठमाडौँ-
पूर्वराजा ज्ञानेन्द्र वीर विक्रम शाहदेवले सुनसरी जिल्लाका विभिन्न भागमा भएको धार्मिक तथा सामाजिक विवाद र द्वन्द्वप्रति चिन्ता व्यक्त गर्दै सबै नेपालीलाई सद्भाव र शान्ति कायम राख्न अपिल गर्नुभएको छ।
​निर्मल निवासस्थित संवाद सचिवालयद्वारा जारी सद्भाव सन्देशमा पूर्वराजा ज्ञानेन्द्रले नेपाल निर्माणको सुरुवाती समयदेखि नै विभिन्न जातजाति र समुदाय आपसमा मिलिजुली, सुख-दुःख बाँध्दै बस्दै आएको उल्लेख गर्नुभएको छ।
​बहुजातीय, बहुभाषिक, र बहुसांस्कृतिक विशेषता बोकेको नेपाली समाजको आफ्नै धर्म, संस्कृति र रीतिस्थिति रहेको जनाउँदै उहाँले भन्नुभएको छ, “नेपालको यो विशिष्ट धार्मिक, सांस्कृतिक एवम् सामाजिक गुणका कारण नै विश्वमा हाम्रो सम्मान रहेको छ। यस्तो विशेषता र गौरव गरिमालाई हामीले गुम्न दिनु हुँदैन।”
​केही दिनअघि सुनसरीका केही गाउँबस्तीमा भड्किएको आपसी द्वन्द्वबाट जनधनको क्षति भएको र त्यसको असर कोशी क्षेत्र तथा तराइका विभिन्न भू-भागमा फैलिन गई जनजीवन अशान्त बनेको खबरले दुःखी तुल्याएको सन्देशमा उल्लेख छ। सामाजिक सामञ्जस्यका लागि परिचित नेपालमा यस किसिमका अवाञ्छित घटना घट्नु चिन्ताको विषय र नेपालको मौलिक मूल्य-मान्यता विपरीत भएको उहाँले बताउनुभएको छ।
​देशको जुनसुकै भू-भागमा रहेका भए पनि सम्पूर्ण नेपालीहरू एक आपसमा मिलेर बस्नु नै आजको आवश्यकता भएकोमा जोड दिँदै उहाँले सामाजिक सद्भाव बिग्रिने खालका कुनै पनि काम कसैबाट हुन नहुने आग्रह गर्नुभएको छ।