वीरगन्ज-
पर्साको वीरगन्जस्थित रानीघाट चोकमा सडक अवरुद्ध गर्दै टायर बालेर प्रदर्शन गरिरहेका हिन्दू संगठनसँग आबद्ध चार जना युवालाई प्रहरीले नियन्त्रणमा लिएको छ।
सार्वजनिक स्थानमा टायर बाल्ने र यातायात आवगमन प्रभावित हुने गरी सडक अवरुद्ध गर्ने कार्यमा संलग्न रहेको भन्दै प्रहरीले उनीहरूलाई नियन्त्रणमा लिएको हो।
पक्राउ पर्नेहरूमा रानीघाट निवासी प्रदीप सराफ र विकास साह लगायत चार जना रहेका छन्।
जिल्ला प्रहरी कार्यालय पर्साका अनुसार प्रहरी नायब उपरीक्षक (डीएसपी) राजु कार्कीको कमान्डमा वडा प्रहरी कार्यालय श्रीपुरका प्रहरी निरीक्षक नवीन थापा मगर र जिल्ला प्रहरी कार्यालय पर्साका प्रहरी निरीक्षक एकनाथ भट्टराईसहितको संयुक्त टोलीले उनीहरूलाई रानीघाट चोकबाटै नियन्त्रणमा लिएको हो।
प्रहरी नियन्त्रणमा रहेका युवाहरूमाथि घटनाको प्रकृति र संलग्नताबारे थप अनुसन्धान भइरहेको जिल्ला प्रहरी कार्यालय पर्साले जनाएको छ। साथै, प्रदर्शनको मुख्य कारण र त्यसपछि उत्पन्न हुन सक्ने शान्ति-सुरक्षाको अवस्थाबारे पनि प्रहरीले सूक्ष्म जानकारी संकलन गरिरहेको छ।
