हेटौँडा –
काठमाडौँबाट वीरगन्जतर्फ आउँदै गरेको एक इभी माइक्रो मकवानपुरको इन्द्रसरोवरमा दुर्घटना हुँदा चार जनाको घटनास्थलमै मृत्यु भएको छ।
इन्द्रसरोवर गाउँपालिका–२ सुकौरामा मङ्गलवार दिउँसो मधेस प्रदेश ०३००१ ज ०७२० नम्बरको इभी माइक्रो सडकबाट करिब पाँच सय मिटर तल खसेर दुर्घटनाग्रस्त भएको हो।
इलाका प्रहरी कार्यालय भीमफेदीका अनुसार माइक्रोमा सवार कुल आठ जनामध्ये चार जनाको घटनास्थलमै ज्यान गएको छ भने अन्य चार जना घाइते भएका छन्। घाइतेमध्ये तीन जनाको अवस्था गम्भीर र एक जनाको अवस्था सामान्य रहेको छ।
मकवानपुरका प्रहरी उपरीक्षक श्याम खत्रीका अनुसार उद्धार गरिएका घाइतेमध्ये एक जनालाई उपचारका लागि हेटौँडा अस्पताल पठाइएको छ भने बाँकी तीन जनालाई काठमाडौँतर्फ पठाइएको छ।
दुर्घटनाको पूर्ण विवरणका साथै मृतक र घाइतेहरूको पहिचान खुलाउने प्रयास भइरहेको प्रहरीले जनाएको छ।
