वीरगन्ज-
गोप्यखबरले प्रकाशन गरेको ‘ग्यालेक्सी सेकेन्डरी स्कूलमा तालाबन्दी: १५० विद्यार्थी अलपत्र, ट्रस्ट संचालकमाथि ठगीको आरोप’ शीर्षकको समाचारले वीरगन्जमा ठूलो हलचल मच्चाएको छ। उक्त समाचारको प्रभावस्वरूप वीरगन्ज महानगरपालिकाले तत्काल कारबाही गर्दै अवैध रूपमा सञ्चालित ग्यालेक्सी सेकेन्डरी स्कूलको मूल गेटमा सिलबन्दी गरेको छ। वीरगन्ज महानगरपालिका वडा नं. १० आदर्श टोलमा रहेको उक्त स्कूलको मूल गेटमा बुधबार महानगरपालिकाको टोलीले सिल लगाएको हो।
सिलबन्दीको कारण
शैक्षिक प्रशासन महाशाखा प्रमुख आनन्द लामिछानेका अनुसार, विद्यालयले विद्यार्थीको पठनपाठनमा अवरोध गरेको, वार्षिक परीक्षा सञ्चालनमा बाधा पुर्याएको, व्यवसाय कर, घर बहाल कर, एकीकृत सम्पत्ति कर नबुझाएको, अनुमति पत्र नविकरण नगरेको, इमिस (शैक्षिक सूचना व्यवस्थापन प्रणाली) अध्यावधिक नगरेको र पटक–पटक माग्दा पनि आवश्यक कागजात उपलब्ध नगराएको कारण सिलबन्दी गरिएको हो। उनले भने, “विद्यालयले कानुनी मापदण्ड पूरा नगरी अवैध रूपमा सञ्चालन गरिरहेको थियो, जसले विद्यार्थीको भविष्यमाथि खेलवाड गरेको छ।”
सिलबन्दी प्रक्रिया
सिलबन्दी गर्न नगर प्रमुखका जनसम्पर्क सल्लाहकार नवराज फुयाँल, शिक्षा अधिकृत सृजना बुढाथोकी, नगर प्रहरी इन्चार्ज हरि प्रसाद भुषालसहित सञ्चारकर्मीहरूको टोली खटिएको थियो। महानगरपालिकाले अवैध रूपमा सञ्चालित विद्यालयहरूमाथि कडा कारबाही गर्ने नीति अनुरूप यो कदम चालेको जनाएको छ।
गोप्य खबरको प्रभाव
यसअघि गोप्य खबरले ‘ग्यालेक्सी सेकेन्डरी स्कूलमा तालाबन्दी: १५० विद्यार्थी अलपत्र, ट्रस्ट संचालकमाथि ठगीको आरोप’ शीर्षकमा समाचार प्रकाशन गरेको थियो। उक्त समाचारले स्कूलको अवैध सञ्चालन र विद्यार्थीमाथि भएको अन्यायलाई उजागर गरेपछि महानगरपालिकाको शैक्षिक प्रशासन महाशाखाले तत्काल कारबाही गरेको हो। समाचारमा ट्रस्ट संचालकमाथि ठगीको आरोप लागेको र १५० विद्यार्थीको शैक्षिक भविष्य संकटमा परेको उल्लेख थियो।
महानगरको कडा नीति
वीरगन्ज महानगरपालिकाले अनुमति नलिई सञ्चालनमा रहेका विद्यालयहरूलाई नियमन र कारबाही गर्ने अभियान तीव्र पारेको छ। सिलबन्दीपछि ग्यालेक्सी स्कूलका संचालकले कानुनी मापदण्ड पूरा नगरेसम्म स्कूल सञ्चालन गर्न नपाउने बताइएको छ।
यस घटनाले वीरगन्जका अन्य अवैध शैक्षिक संस्थाहरूलाई पनि सचेत गराएको छ भने अभिभावक र विद्यार्थीले महानगरको कदमको स्वागत गरेका छन्।
ग्यालेक्सी सेकेन्डरी स्कूलमा तालाबन्दी: १५० विद्यार्थी अलपत्र, ट्रस्ट संचालकमाथि ठगीको आरोप
