विजय चौहान-
प्रहरीले सही दिशातर्फ अनुसन्धान अगाडि नबढाएको कारण राजन साह कानुले आफ्नो कान्छो छोरो समेत गुमाउन पुगेका छन् । बाराको परवानीपुर गाउँपालिका वडा नं. ८ नेवतन बहुवरी घर भई हाल वीरगन्ज–१० रानीघाटमा डेरागरी बस्दै आएका राजन साह कानुका ठूला छोरा सत्यम साह कानुको मृत्युका विषयमा प्रहरीले राम्ररी अनुसन्धान नगरेकै कारण, ठूला छोरालाई विष खुवाई हत्या गर्ने व्यक्तिहरुले नै कान्छो छोरा शिवम साह कानु समेत हत्या गर्न सफल भएका हुन् ।
गौतम पटेललगायतका व्यक्तिहरुले असोज १० गते बिहानै विष मिसाइएको दूध सत्यमलाई खुवाई हत्या गरेको जानकारी प्रहरी विट रानीघाटका इञ्चार्ज प्रहरी सहायक निरीक्षक लालबाबु साहलाई दिँदा समेत कुनै कार्यवाही नगरेकै कारण सोको चार दिन नबित्दै सोही समूहले कान्छो छोरा शिवमलाई छुरा प्रहार गरी हत्या गरेको मृतकका पिता राजन साहको आरोप रहेको छ ।
गोप्यखबरसँग कुरा गर्दै राजनले प्रहरीले समयमा अनुसन्धान गरी गौतम, कुन्दन लगायतका व्यक्तिलाई पक्राउ गरेको भए आफ्नो कान्छो छोरो अहिले पनि जिउँदो हुने थियो भन्दै, उहाँले प्रहरीकै कमजोरीका कारण दुवै छोराको हत्या भएको आरोप लगाउँछन् ।
असोज १० गते बिहान ६ बजे रानीघाट पुल नजिकैको एक मदिरा पसलमा गौतम पटेल, करण पटेल र कुन्दन पटेलसँगै मदिरा सेवन गर्ने क्रममा गौतम पटेलले दूधमा विष मिलाई सत्यमलाई खुवाएको स्थानीय प्रत्यक्षदर्शीले प्रहरीलाई बताउँदा समेत प्रहरीले विष सेवन गरी आत्महत्या गरेको केस बनाई हत्याराहरुलाई उम्किने अवसर प्रदान गरेको उहाँले बताउनुभयो ।
सत्यमको पहिलो हत्यामा कारवाही नभएपछि त्यसबाट हौसिएकाहरूले शिवमको हत्या गर्न सफल भएको राजनको भनाइ रहेको छ ।
यसै विषयमा प्रहरी विट रानीघाटका इञ्चार्ज प्रहरी सहायक निरीक्षक साहसँग कुरा गर्दा सत्यमको मृत्युको विषयमा आफूलाई बोल्ने अधिकार नभएको र यस विषयमा वडा प्रहरी कार्यालय श्रीपुरका इञ्चार्ज वा जिल्ला प्रहरी कार्यालय पर्साका प्रवक्तासँग कुरा गर्न भन्नुभयो ।
यसैबीच शिवम साह कानुको हत्या भएको २४ घण्टा नबित्दै पर्सा प्रहरीले हत्यामा संलग्न पाँच जना अभियुक्तलाई पक्राउ गरेको छ । जिल्ला प्रहरी कार्यालय पर्साले शुक्रबार पत्रकार सम्मेलनको आयोजना गरी शिवम हत्या काण्डमा संलग्न मुख्य अभियुक्तदेखि हत्यामा सहयोग गर्ने वीरगन्ज महानगरपालिका–२४ रामगढवा निवासी पाँचै जनालाई पक्राउ गरेको दाबी गरेको छ ।
शिवम साहको हत्याका मुख्य अभियुक्त रामगढवा निवासी वर्ष १९ का गौतम पटेललाई घटना भएको २० घण्टामै पक्राउ गर्न सफल भएको जिल्ला प्रहरी कार्यालय पर्साका प्रमुख प्रहरी उपरीक्षक सुदीपराज पाठकले पत्रकार सम्मेलनमा जानकारी दिनुभयो । उहाँले व्यक्तिगत दुश्मनी र आफ्नै समूह (ग्याङ) को वर्चस्वलाई स्थापित गर्न शिवमको हत्या भएको र सो हत्याका योजनामा सहयोग गर्ने रामगढवा निवासी २० वर्षीय सुभांकर चौरसिया, २२ वर्षीय अमित पटवा (करण पटेल), २४ वर्षीय चन्दन चौरसिया र १९ वर्षीय अमन पटेललाई पक्राउ गरिएको बताउनुभयो ।
असोज १४ गते राति साँढे ११ बजे वीरगन्ज–१० गीता मन्दिरको पूर्वमा रहेको मुख्य सडकमा गौतमलगायतको समूहले शिवमलाई हत्या गरेपछि अनुसन्धानलाई अगाडि बढाउँदा पहिले सुभांकरको संलग्नता भेटिएको र उनलाई नियन्त्रणमा लिएर सोधपुछ गर्दा मुख्य अभियुक्तलगायतका व्यक्तिहरुलाई पक्राउ गर्न सफल भएको उपरीक्षक पाठकले दाबी गर्नुभयो ।
मृतक शिवमसँग गौतमको पुरानो रिसइबी र दुवै जनाले चलाएको आ–आफ्नो समूह अर्थात ग्याङको वर्चस्व कायम गर्न शिवमको हत्या भएको अनुसन्धानका क्रममा भेटिएका तथ्यले पुष्टि गरेको उपरीक्षक पाठकले जानकारी दिनुभयो ।
पत्रकार सम्मेलनमा सत्यमलाई विष खुवाई मारिएको विषयमा प्रहरीले के गरिरहेको छ भन्ने जिज्ञासा राख्दा उपरीक्षक पाठकले प्रहरीले त्यसतर्फ समेत अनुसन्धान अगाडि बढाएको बताउनुभयो । सत्यमको हत्या भएको हो भने सो घटनामा संलग्नलाई कानुनको दायरामा ल्याउने प्रतिबद्धता व्यक्त गर्नुभयो ।
