बीजिङ –
अमेरिकी राष्ट्रपति डोनाल्ड ट्रम्पलाई चिनियाँ राष्ट्रपति सी जिनपिङले बिहीबार ग्रेट हल अफ द पिपुलमा भव्य राजकीय भोजमार्फत स्वागत गरेका छन्। उक्त भोजमा चिनियाँ र अमेरिकी संस्कृतिको मिश्रण झल्किने उत्सवपूर्ण मेनु प्रस्तुत गरिएको थियो।
भोजको मेनुमा क्रिस्पी बीफ रिब्स, बेइजिङ रोस्ट डक, तिरामिसु र ट्रम्पको मनपर्ने आइसक्रिमसमेत समावेश थियो।
भोजका क्रममा राष्ट्रपति सी जिनपिङले बढ्दो तनाव-विशेषगरी ताइवान, फेन्टानिल र दक्षिण चीन सागरमा चीनको विस्तारवादी दाबी-बीच पनि अमेरिका-चीन सम्बन्धबारे अमेरिकी जनताको प्रशंसा गरेका थिए।
पूर्ण मेनु
स्टार्टर्स (Hors d’Oeuvres):
- लोब्स्टर इन टोमाटो सूप
- क्रिस्पी बीफ रिब्स
- बेइजिङ रोस्ट डक
- सिजनल तरकारी स्ट्यु
- मस्टर्ड ससमा ढिलो पकाइएको साल्मन
- प्यान-फ्राइड पोर्क बन
- ट्रम्पेट शेल आकारको पेस्ट्री
मुख्य र अन्तिम परिकार:
- तिरामिसु
- फलफूल र आइसक्रिम
मेनुले बेइजिङका प्रसिद्ध परिकारहरूलाई विशेष रूपमा प्रस्तुत गरेको देखिन्छ, विशेषगरी पेकिङ डक र सोया पेस्टसहितको नुडल्स परिकार।
यो सन् २०१७ मा ट्रम्पको पहिलो चीन भ्रमणका बेला प्रस्तुत गरिएको मेनुभन्दा फरक थियो, जहाँ अमेरिकी स्वाद मिलाउने उद्देश्यले कुंग पाओ चिकेन र टोमाटो सससहितको स्ट्युड बीफ स्टेक पनि राखिएको थियो।
तर यस पटक पनि ट्रम्पको स्वादलाई ध्यानमा राखिएको देखिन्छ, विशेषगरी बीफ रिब्स समावेश गरेर,जसले उनको राम्रोसँग पकाइएको स्टेक मनपर्ने बानीलाई संकेत गर्छ।
भोजका क्रममा ट्रम्प र सी जिनपिङ एकै टेबलमा बसेका थिए। वातावरणलाई हरियाली सजावट, सानो ताल, हाँस (स्वान) र मिनिएचर चिनियाँ संरचनाहरूले आकर्षक बनाइएको थियो।
भोज सुरु हुनुअघि ट्रम्पले दुई देशबीचको दीर्घकालीन सम्बन्धबारे टोस्ट दिएका थिए। उनले चीन र अमेरिकाबीच भएको ऐतिहासिक सांस्कृतिक आदानप्रदानको चर्चा गर्दै वाशिङ्टन मोनुमेन्टसहितको ढुंगाको शिलासहितका उपहारहरूको पनि उल्लेख गरे।
उनले अमेरिकी संस्थापक बेन्जामिन फ्र्याङ्कलिनले कन्फ्युसियसका विचारहरू साझा गरेको उदाहरण दिँदै आज अमेरिकामा चिनियाँ खाना र संस्कृतिको व्यापक प्रभावबारे टिप्पणी गरे।
त्यसपछि चिनियाँ राष्ट्रपति सी जिनपिङले अमेरिका–चीन सम्बन्धलाई विश्वकै सबैभन्दा महत्वपूर्ण द्विपक्षीय सम्बन्ध भन्दै सहकार्य अपरिहार्य रहेको बताए। उनले दुवै देशले सम्बन्धलाई स्थिर राख्नुपर्नेमा जोड दिँदै यसलाई बिगार्नु हुँदैन भन्ने धारणा व्यक्त गरे।
